जळगाव

इंदिराबाई ललवाणी विद्यालयाच्या विद्यार्थिनीची नाशिक विभागीय स्पर्धेसाठी निवड जामनेर, दि. ४ ऑक्टोबर : महाराष्ट्र राज्य क्रीडा व युवक सेवा संचालनालय, पुणे, जिल्हा क्रीडा अधिकारी कार्यालय, जळगाव तसेच जळगाव जिल्हा बुद्धिबळ संघटनेच्या संयुक्त विद्यमाने जिल्हास्तरीय शालेय बुद्धिबळ स्पर्धेचे आयोजन करण्यात आले होते. दि. ३ व ४ ऑक्टोबर रोजी जळगाव येथील काशिनाथ पलोड पब्लिक स्कूल येथे या स्पर्धा पार पडल्या. या स्पर्धेत इंदिराबाई ललवाणी माध्यमिक व उच्च माध्यमिक विद्यालयाची इयत्ता ११ वी विज्ञान शाखेतील विद्यार्थिनी कु. चेतना निलेश पाटील हिने १७ वर्षांखालील मुलींच्या गटात उत्कृष्ट कामगिरी करत चतुर्थ क्रमांक पटकावला. या उल्लेखनीय कामगिरीच्या जोरावर तिची शालेय नाशिक विभागीयस्तरीय बुद्धिबळ स्पर्धेसाठी निवड झाली आहे. नाशिक विभागीयस्तरीय स्पर्धा दि. ५ ऑक्टोबर रोजी बिटको कॉलेज, नाशिक येथे होणार असून, या स्पर्धेसाठी चेतना पाटीलचे सर्व स्तरातून अभिनंदन होत आहे. यावेळी जळगाव जिल्हा बुद्धिबळ संघटनेचे राष्ट्रीय ऑर्बिटर प्रवीण ठाकरे तसेच ऑर्बिटर अभिषेक जाधव यांनी चेतना पाटील हिला शुभेच्छा दिल्या. याप्रसंगी क्रीडा शिक्षक प्रा. समीर घोडेस्वार आदी उपस्थित होते. चेतना पाटीलच्या या यशाबद्दल इंदिराबाई ललवाणी शैक्षणिक संकुल संस्थेचे अध्यक्ष श्री. राजेंद्र भाऊ महाजन, सचिव श्री. किशोर भाऊ महाजन, सर्व संचालक मंडळ, मुख्याध्यापक श्री. एस. आर. चव्हाण, उपमुख्याध्यापक श्री. एस. एन. चवरे, उपप्राचार्य प्रा. डी. झेड. गायकवाड, पर्यवेक्षक श्री. जी. जी. अत्तरदे व श्री. व्ही. बी. पाटील यांनी तिचे अभिनंदन करून विभागीय स्पर्धेसाठी शुभेच्छा दिल्या. या यशासाठी क्रीडा विभाग प्रमुख श्री. जी. सी. पाटील, श्री. बी. पी. बेनाडे, श्री. गजानन कचरे तसेच क्रीडा शिक्षक प्रा. समीर घोडेस्वार यांचे मोलाचे मार्गदर्शन लाभले.

दोन जिवंत काडतुसे जप्त; यावल पोलिसांत आर्म्स ॲक्टनुसार गुन्हा दाखल यावल : आगामी सण-उत्सवांच्या पार्श्वभूमीवर कायदा व सुव्यवस्था अबाधित ठेवण्यासाठी पोलिसांकडून गुन्हेगारांची तपासणी आणि गस्त वाढविण्यात आली आहे. याच कारवाईदरम्यान किणगाव येथे यावल पोलिस व स्थानिक गुन्हे शाखा, जळगाव यांच्या पथकाने एका २५ वर्षीय तरुणाला देशी बनावटीचे पिस्तूल व दोन जिवंत काडतुसांसह ताब्यात घेतले. ही कारवाई किणगाव गावात करण्यात आली. संशयित तरुणाकडून पिस्तूल व दोन जिवंत काडतुसे असा मुद्देमाल जप्त करून त्याला यावल पोलिस ठाण्यात आणण्यात आले. त्याच्याविरुद्ध आर्म्स ॲक्टच्या संबंधित कलमांनुसार गुन्हा दाखल करण्यात आला आहे. आगामी सण-उत्सवांच्या काळात कोणताही गंभीर गुन्हा घडू नये, यासाठी यावल पोलिस ठाण्याच्या हद्दीत नाकाबंदी, सखोल पेट्रोलिंग तसेच संशयित व्यक्ती आणि गुन्हेगारांची तपासणी करण्याच्या सूचना वरिष्ठ पोलिस अधिकाऱ्यांनी दिल्या आहेत. जळगाव जिल्हा पोलिस अधीक्षक श्रीकांत धिवरे, अपर पोलिस अधीक्षक संदीप गावित तसेच फैजपूरचे डीवायएसपी अनिल बळगुजर यांच्या मार्गदर्शनाखाली ही कारवाई करण्यात आली.पिस्तूल व जिवंत काडतुसे आढळून आल्याने या कारवाईमुळे यावल तालुक्यात खळबळ उडाली असून, पोलिसांकडून पुढील तपास सुरू आहे.

पुणे | प्रतिनिधी : अग्रीस्टॅक उपक्रमांतर्गत शेतकरी नोंदणीसाठी तयार करण्यात येणाऱ्या डिजिटल Farmer ID बाबत महाराष्ट्र शासनाच्या कृषी विभागाने महत्त्वाचे निर्देश जारी केले आहेत. शेतकऱ्यांचे Farmer ID कार्ड परवानगीशिवाय छापणे, त्याची प्रत तयार करणे किंवा वितरित करणे हा गंभीर प्रकार असल्याचे विभागाने स्पष्ट केले आहे. कृषी विभागाच्या २४ सप्टेंबर २०२५ रोजीच्या पत्रानुसार, भारत सरकारच्या अग्रीस्टॅक उपक्रमांतर्गत शेतकरी नोंदणीची प्रक्रिया राबविण्यात येत असून, त्यासाठी डिजिटल Farmer ID तयार करण्यात येत आहे. मात्र, काही ठिकाणी CSC/सेवा केंद्रे तसेच संबंधित संस्थांकडून शेतकऱ्यांना Farmer ID चे भौतिक अथवा ऑफलाइन कार्ड देण्यात येत असल्याचे निदर्शनास आले आहे. केंद्र शासनाच्या कृषी व शेतकरी कल्याण मंत्रालयाच्या निर्देशांचा हवाला देत कृषी विभागाने स्पष्ट केले आहे की, अॅग्रीस्टॅक अंतर्गत कोणतेही भौतिक किंवा ऑफलाइन Farmer ID कार्ड अधिकृतपणे मान्य करण्यात आलेले नाही. अनधिकृत कार्डपासून सावध राहण्याचे आवाहन परवानगीशिवाय Farmer ID कार्ड तयार करणे, छापणे, वितरित करणे किंवा त्याची प्रत प्रसारित करणे यामुळे गैरवापराची शक्यता निर्माण होऊ शकते. त्यामुळे अशा प्रकारच्या अनधिकृत प्रक्रियांपासून शेतकऱ्यांनी सावध राहावे, असे आवाहन कृषी विभागाने केले आहे. या संदर्भात व्हॉट्सॲप संदेश, वृत्तपत्रे, दवंडी तसेच इतर स्थानिक माध्यमांतून व्यापक जनजागृती करण्याचे निर्देश संबंधित यंत्रणांना देण्यात आले आहेत. शेतकऱ्यांनी Farmer ID संदर्भात कोणत्याही व्यक्ती किंवा संस्थेकडून अनधिकृत छापील कार्ड अथवा त्याची प्रत स्वीकारण्यापूर्वी योग्य ती खात्री करावी. Farmer ID बाबत अधिकृत माहिती व प्रक्रियेसाठी संबंधित कृषी विभागाचे कार्यालय किंवा अधिकृत यंत्रणेशी संपर्क साधावा, असे आवाहन करण्यात आले आहे. — जे बी एन महाराष्ट्र न्यूज

‘निरोगी उद्यासाठी आयुर्वेद’ विषयावरील निबंध व वक्तृत्व स्पर्धेतील विजेत्यांचा मान्यवरांच्या हस्ते सत्कार जामनेर : जामनेर येथील ज्ञानगंगा माध्यमिक व कनिष्ठ महाविद्यालयात सेवा संकल्प अभियानांतर्गत विविध उपक्रमांचे आयोजन करण्यात आले. या अभियानाच्या माध्यमातून विद्यार्थ्यांमध्ये आरोग्यविषयक जनजागृती निर्माण करण्याच्या उद्देशाने ‘निरोगी उद्यासाठी आयुर्वेद’ या विषयावर निबंध व वक्तृत्व स्पर्धा घेण्यात आली. या स्पर्धेत उत्कृष्ट कामगिरी करणाऱ्या विद्यार्थ्यांचा प्रमाणपत्र व ट्रॉफी देऊन गौरव करण्यात आला. कार्यक्रमाची सुरुवात जामनेर नगर परिषदेच्या नगराध्यक्षा सौ. साधनाताई महाजन यांच्या शुभहस्ते माता सरस्वतीच्या प्रतिमेचे पूजन करून करण्यात आली. यावेळी नगर परिषदेचे उपनगराध्यक्ष डॉ. प्रशांत बोंडे, श्री. के. बी. माळी, विद्यालयाचे प्राचार्य श्री. राजेंद्र सोनवणे, तालुका वैद्यकीय अधिकारी डॉ. राजेश सोनवणे, उपजिल्हा रुग्णालय जामनेरचे वैद्यकीय अधीक्षक डॉ. हर्षल चांदा, तसेच डॉ. जितेंद्र वानखेडे, डॉ. चंद्रमणी सुरवाडे, डॉ. धनंजय पाटील, डॉ. निलेश चव्हाण, डॉ. पंकज पाटील, अमोल सोनवणे, सलमा तडवी, मोनाली सावळे, हर्षा गवळे, अनिता बडगुजर यांच्यासह आर.बी.एस.के. पथकातील अधिकारी व कर्मचारी उपस्थित होते. दि. १७ सप्टेंबर ते १७ ऑक्टोबर २०२६ या कालावधीत सेवा संकल्प अभियानांतर्गत सदर स्पर्धांचे आयोजन करण्यात आले. मा. जिल्हा आरोग्य अधिकारी, जिल्हा परिषद जळगाव यांच्या मार्गदर्शनाखाली तालुका वैद्यकीय अधिकारी, जामनेर यांच्या माध्यमातून हा उपक्रम राबविण्यात आला. इयत्ता ८ वी ते १२ वी पर्यंतच्या विद्यार्थ्यांनी निबंध व वक्तृत्व स्पर्धेत उत्स्फूर्त सहभाग नोंदविला. ‘निरोगी उद्यासाठी आयुर्वेद’ या विषयावर विद्यार्थ्यांनी आयुर्वेदाचे महत्त्व, निरोगी जीवनशैली, पारंपरिक उपचारपद्धती आणि आरोग्य संवर्धन याबाबत आपले विचार प्रभावीपणे मांडले. स्पर्धेत प्रथम, द्वितीय व तृतीय क्रमांक मिळविणाऱ्या विद्यार्थ्यांना प्रमाणपत्र व ट्रॉफी देऊन मान्यवरांच्या हस्ते गौरविण्यात आले. विद्यार्थ्यांच्या कलागुणांना प्रोत्साहन मिळावे आणि आरोग्यविषयक जागरूकता वाढावी, या उद्देशाने आयोजित केलेल्या या उपक्रमाचे उपस्थितांकडून कौतुक करण्यात आले. कार्यक्रमाचे सूत्रसंचालन श्री. विलास पाटील सर यांनी केले, तर आभार प्रदर्शन श्री. विजय कोळी सर यांनी केले. या उपक्रमामुळे विद्यार्थ्यांना आपल्या आरोग्याबाबत जागरूक राहण्यासोबतच आयुर्वेदाच्या महत्त्वाची माहिती मिळाली.

✍️ एकमन संतोष भिसे,📰 JBN महाराष्ट्र NEWS | विशेष लेख आयुष्य म्हणजे एक पुस्तकच आहे…काही पानं आनंदाने भरलेली, काही आठवणींनी सजलेली, तर काही पानं अश्रूंनी भिजलेली.कधी कधी आयुष्यात असा प्रसंग येतो, की आपल्याला वाटतं—“बस्स… आता सगळं संपलं!”एखादं नातं तुटतं, एखादं स्वप्न अपूर्ण राहतं, अपयश पदरी पडतं किंवा एखादी व्यक्ती कायमची दूर जाते… आणि आपण त्या एका प्रसंगालाच आपल्या संपूर्ण आयुष्याचा शेवट समजतो.पण खरं पाहिलं तर…एक पान संपतं, पुस्तक नाही!जखम झाली म्हणून प्रवास थांबत नाही.अपयश आलं म्हणून स्वप्न संपत नाही.कोणी सोडून गेलं म्हणून आयुष्य रिकामं होत नाही.काही माणसं आपल्या आयुष्यात येतात, काही शिकवून जातात आणि काही न सांगता निघून जातात. त्यांच्या जाण्याने निर्माण झालेली पोकळी काही काळ असह्य वाटते; पण काळ पुढे सरकत राहतो आणि आयुष्याची नवी पानं उघडत राहतात.आपली अडचण एवढीच असते की आपण जुन्या पानावरच थांबतो.तेच दुःख पुन्हा पुन्हा आठवतो…त्याच चुका पुन्हा पुन्हा मनात आणतो…आणि मग स्वतःलाच सांगतो—“माझ्यासाठी आता काही उरलेलं नाही.”पण आयुष्य हळूच सांगत असतं—“थांबू नकोस… अजून पुढची पानं बाकी आहेत!”कदाचित पुढच्या पानावर एखादी नवी संधी तुमची वाट पाहत असेल.कदाचित एखादं अपूर्ण स्वप्न पूर्ण होणार असेल.कदाचित एखादी व्यक्ती तुमच्या आयुष्यात येऊन जुन्या जखमांवर प्रेमाचा हात ठेवणार असेल.आणि कदाचित एक दिवस तुम्ही मागे वळून पाहाल आणि म्हणाल—“ज्याला मी माझ्या आयुष्याचा शेवट समजलो होतो, तोच माझ्या नव्या सुरुवातीचा क्षण होता!”म्हणून आयुष्याच्या एखाद्या पानावर दुःख लिहिलं असेल, तर पुस्तक बंद करू नका.पान उलटा…कारण तुमची कथा अजून पूर्ण झालेली नाही.आज परिस्थिती कठीण असेल, आज मन उदास असेल, आज सगळं चुकीचं वाटत असेल… तरीही उद्याचं पान तुमच्या हातात आहे.शेवटचा अध्याय अजून लिहिलेला नाही.आणि कधी कधी…आयुष्याची सगळ्यात सुंदर गोष्ट शेवटच्या पानावरच लिहिली जाते!✍🏻 शब्दांकन : एकमन संतोष भिसेJBN महाराष्ट्र NEWS“अभिव्यक्ती स्वातंत्र्य, न्याय व हक्क”तुमच्या गावापासून महाराष्ट्रापर्यंत…

जामनेर | JBN महाराष्ट्र NEWS 🎙️ जामनेरमध्ये रोजगार महाकुंभ मेळावा उत्साहात संपन्न! भारताचे माननीय पंतप्रधान श्री नरेंद्र मोदी यांच्या वाढदिवसानिमित्त जामनेर येथे रोजगाराच्या संधी उपलब्ध करून देण्यासाठी रोजगार महाकुंभ मेळाव्याचे आयोजन करण्यात आले. श्रीमंत राघोजी बाबा मंगल कार्यालय, जामनेर येथे २९ सप्टेंबर २०२६ रोजी जिल्हा कौशल्य रोजगार उद्योजकता व नाविन्यता विभाग, जळगाव आणि स्वर्गीय हरिभाऊ रामकृष्ण बारी शासकीय औद्योगिक प्रशिक्षण संस्था, जामनेर यांच्या संयुक्त विद्यमाने हा मेळावा पार पडला. या रोजगार मेळाव्याचे उद्घाटन जामनेर शहर पोलीस स्टेशनचे पोलीस निरीक्षक श्री. निवृत्ती बोराडे साहेब यांच्या हस्ते करण्यात आले. या मेळाव्याला व्यासपीठावर जामनेर शहरातील श्री जितू भाऊ पाटील ,श्री चंद्रकांत बाविस्कर, श्री.महेन्द्र बाविस्कर,श्री रविंद्र झाल्टे ,श्री दिपक तायडे (मंत्री महोदय मा.ना. श्री गिरीषजी महाजन यांचे स्विय सहायक) यांच्या सह विविध लोकप्रतिनिधी उपस्थित होते. कार्यक्रमाच्या अध्यक्षस्थानी संस्थेचे प्राचार्य श्री. आर. टी. चौधरी होते. तर जिल्हा कौशल्य रोजगार विभागाच्या सौ. निशा भोई मॅडम विशेष अतिथी म्हणून उपस्थित होत्या. यावेळी विविध लोकप्रतिनिधी, मान्यवर आणि विद्यार्थी मोठ्या संख्येने उपस्थित होते. उद्घाटनपर मार्गदर्शन करताना पोलीस निरीक्षक निवृत्ती बोराडे यांनी विद्यार्थ्यांना व्यसनांपासून दूर राहण्याचे आणि वाहतुकीचे नियम तंतोतंत पाळण्याचे आवाहन केले. लोकप्रतिनिधी श्री. चंद्रकांत बाविस्कर यांनी विद्यार्थ्यांनी कौशल्य विकासावर भर देण्याचे आवाहन केले. तर आयएमसी सदस्य श्री. कर्णबारी यांनी सुशिक्षित बेरोजगार उमेदवार आणि उद्योग क्षेत्रामधील असलेली कौशल्याची दरी दूर करण्याची गरज व्यक्त केली. अध्यक्षीय भाषणात प्राचार्य श्री. चौधरी सर यांनी संस्थेमार्फत राबविण्यात येणाऱ्या विविध उपक्रमांची माहिती देत, विद्यार्थ्यांनी उद्योग क्षेत्रात काम करण्यासाठी आवश्यक कौशल्य आत्मसात करण्याचे आवाहन केले. या रोजगार महाकुंभ मेळाव्यात तब्बल १९ विविध आस्थापनांनी सहभाग घेतला. मेळाव्यासाठी एकूण २८३ उमेदवारांनी हजेरी नोंदवली. त्यापैकी १४९ उमेदवारांची प्राथमिक निवड, तर १११ उमेदवारांची अंतिम निवड करण्यात आली. कार्यक्रमाचे सूत्रसंचालन श्री. प्रांजल जोशी यांनी केले, तर प्रास्ताविक सौ. शुभांगी बर्वे मॅडम यांनी केले. हा रोजगार मेळावा यशस्वी करण्यासाठी संस्थेतील अधिकारी, कर्मचारी आणि सर्व सहकाऱ्यांनी अहोरात्र परिश्रम घेतले. श्री. फेकरीकर साहेब यांच्या मार्गदर्शनाखाली गट निदेशक श्री. नितीन चौधरी, श्री. व्ही. बी. सूर्यवंशी, श्री. बेलदार, आर. बी. पाटील, विनोद चौधरी, वाघ, जगदाळे, पजई, डांगे, शुभांगी बर्वे, कदम, पतंगे, धनगर, नारखेडे, खोडपे, योगेश्वर पाटील, मनीष पाटील, रूपाली पाटील, बढे, जे. डी. पाटील, हर्षदा इंगळे, एम. एम. पाटील, दत्तू सोनवणे, जंगले, रिंकल पाटील, आर. आर. पाटील, व्यंकटेश माळी, झाल्टे, खुरपडे यांच्यासह संस्थेतील सर्व कर्मचारी आणि सहकाऱ्यांनी कार्यक्रमाच्या यशस्वीतेसाठी मोलाचे योगदान दिले. जामनेरच्या युवकांना रोजगाराच्या नव्या संधी उपलब्ध करून देणारा हा रोजगार महाकुंभ मेळावा ठरला, आणि कौशल्य विकासासोबतच उद्योग व उमेदवार यांच्यातील दुवा मजबूत करण्याच्या दिशेने एक महत्त्वाचे पाऊल ठरले. जिल्हा कौशल्य विकास, रोजगार व उद्योजकता मार्गदर्शन केंद्र, जळगाव, जामनेर रेवा गुजर मंडळ आणि संबंधित संस्थांच्या संयुक्त विद्यमाने श्रीमंत बाबाजीराव पाटील मंगल कार्यालय, जामनेर येथे या रोजगार मेळाव्याचे आयोजन करण्यात आले होते. या मेळाव्यात विविध कंपन्यांनी सहभाग घेत टेक्निशियन, फिट्टर, मशीन ऑपरेटर, सुपरवायझर, ट्रेनी, डिझाईन इंजिनिअर, मेंटेनन्स मॅनेजर, प्रोडक्शन इंजिनिअर, हेल्पर, सेल्स एक्झिक्युटिव्ह, सर्व्हिस अॅडव्हायझर यासह विविध पदांसाठी उमेदवारांच्या मुलाखती घेतल्या. १०वी, १२वी, ITI, डिप्लोमा आणि पदवीधर उमेदवारांसाठी विविध रोजगाराच्या संधी या मेळाव्यात उपलब्ध करून देण्यात आल्या होत्या. या उपक्रमामुळे जामनेर आणि परिसरातील रोजगाराच्या शोधात असलेल्या अनेक युवक-युवतींना कंपन्यांशी थेट संपर्क साधण्याची आणि रोजगाराच्या संधी मिळवण्याची संधी मिळाली. 🎙️ JBN महाराष्ट्र NEWSचा सवाल नाही, तर सकारात्मक बातमी—रोजगारासाठी तरुणांना शहराबाहेर भटकंती करण्याची वेळ कमी व्हावी आणि स्थानिक पातळीवरच अधिकाधिक रोजगाराच्या संधी उपलब्ध व्हाव्यात, हीच अपेक्षा! JBN महाराष्ट्र NEWS — तुमच्या गावापासून महाराष्ट्रापर्यंत…

गॅस रिफिलसाठी पैसे कमी पडले? जाणून घ्या योजना, हप्ते आणि लाभ घेण्याची पद्धत मुंबई | प्रतिनिधी घरगुती LPG सिलिंडरची रिफिल करण्यासाठी अचानक पैसे कमी पडल्यास भारतगॅस ग्राहकांसाठी महत्त्वाची सुविधा उपलब्ध करून देण्यात आली आहे. भारत पेट्रोलियम कॉर्पोरेशन लिमिटेड (BPCL) अंतर्गत भारतगॅसकडून ‘Buy Now, Pay Later’ (BNPL) या स्वरूपात LPG रिफिलसाठी ₹600 पर्यंतचे मायक्रो लोन उपलब्ध करून देण्याची माहिती जाहीर करण्यात आली आहे. ₹600 पर्यंत कर्ज, व्याज नाही या सुविधेअंतर्गत पात्र ग्राहकाला LPG रिफिलसाठी ₹600 पर्यंतची रक्कम उधार घेता येऊ शकते. उपलब्ध माहितीनुसार या रकमेसाठी व्याज आकारले जाणार नाही. त्यामुळे सिलिंडरची गरज असताना संपूर्ण रक्कम एकाच वेळी भरण्याचा आर्थिक ताण कमी होऊ शकतो. ₹100 चे किती हप्ते? येथे एक महत्त्वाची बाब ग्राहकांनी लक्षात घेणे गरजेचे आहे. सोशल मीडियावर काही ठिकाणी ‘दरमहा ₹100’ असा उल्लेख होत असला, तरी उपलब्ध अहवालांनुसार ₹600 ची रक्कम ₹100 च्या 6 साप्ताहिक हप्त्यांमध्ये परतफेड करण्याची माहिती देण्यात आली आहे. म्हणजेच— ₹600 कर्ज → ₹100 × 6 साप्ताहिक हप्ते = ₹600 परतफेड यामध्ये व्याज नसल्याचे योजनेच्या माहितीत नमूद आहे. कोणाला उपयोग होऊ शकतो? महिन्याच्या शेवटी आर्थिक अडचण निर्माण झाली, अचानक घरातील गॅस संपला किंवा त्या वेळी सिलिंडरची संपूर्ण रक्कम भरणे शक्य झाले नाही, अशा परिस्थितीत ही सुविधा ग्राहकांसाठी उपयोगी ठरू शकते. लाभ कसा घ्यायचा? भारतगॅसच्या या सुविधेचा लाभ घेण्यासाठी ग्राहकांनी आपल्या नजीकच्या भारतगॅस वितरक/गॅस एजन्सीशी संपर्क साधावा. तेथे या सुविधेची उपलब्धता, पात्रता, आवश्यक प्रक्रिया आणि परतफेडीच्या अटी याबाबत माहिती मिळू शकते. उपलब्ध माहितीनुसार ही सुविधा सर्व ग्राहकांना आपोआप लागू होते असे गृहीत धरू नये; स्थानिक वितरकाकडून पात्रता व उपलब्धता तपासणे आवश्यक आहे. महाराष्ट्रातही सुविधा BPCLच्या आर्थिक अहवालानुसार ‘Buy Now Pay Later’ सुविधा महाराष्ट्रासह आंध्र प्रदेश, अरुणाचल प्रदेश, गुजरात, मध्य प्रदेश, ओडिशा, तमिळनाडू आणि तेलंगणा या राज्यांमध्ये रोलआउट करण्यात आली होती. ग्राहकांनी काय काळजी घ्यावी? कोणत्याही अनोळखी लिंकवर क्लिक करून किंवा व्यक्तीला OTP, UPI PIN, ATM PIN अथवा बँकिंगची गोपनीय माहिती देऊ नये. योजनेचा लाभ घेण्यासाठी अधिकृत भारतगॅस वितरकाकडूनच माहिती घ्यावी. JBN महाराष्ट्र NEWS | तुमच्या गावापासून महाराष्ट्रापर्यंत…

पीडितेच्या तक्रारीनंतर कारवाई; अल्पवयीन मुलीचीही कायद्यानुसार चौकशी सुरू चाळीसगाव : जळगाव जिल्ह्यातील चाळीसगाव शहरालगत एका १३ वर्षीय अल्पवयीन मुलीवरील कथित लैंगिक अत्याचाराचा गंभीर प्रकार समोर आला आहे. या प्रकरणी पीडितेच्या तक्रारीवरून चाळीसगाव पोलीस ठाण्यात संबंधितांविरुद्ध गुन्हा दाखल करण्यात आला असून, पोलिसांकडून पुढील तपास सुरू आहे. मिळालेल्या माहितीनुसार, दिनांक २३ रोजी अल्पवयीन पीडिता आपल्या आईसोबत कामाच्या ठिकाणी गेली होती. यावेळी तिची आई काही वेळासाठी तेथून गेल्याची संधी साधून दोन तरुणांनी एका अल्पवयीन मुलीच्या मदतीने पीडितेला महिलांच्या स्वच्छतागृहात नेल्याचा आरोप तक्रारीत करण्यात आला आहे. तेथे तिच्यावर लैंगिक अत्याचार केल्याचा आरोप असून, पीडितेने विरोध केल्यानंतर तिला धमकावण्यात आल्याचेही फिर्यादीत नमूद करण्यात आले आहे. या घटनेनंतर पीडितेच्या तक्रारीवरून चाळीसगाव पोलीस ठाण्यात भारतीय न्याय संहिता (BNS) मधील संबंधित कलमांसह कलम ६४(अ) अंतर्गत गुन्हा दाखल करण्यात आल्याची माहिती आहे. प्रकरणात सहभागी असल्याचा आरोप असलेल्या अल्पवयीन मुलीबाबतही कायद्यानुसार प्रक्रिया सुरू करण्यात आली आहे. दरम्यान, या प्रकरणाचा पुढील तपास चाळीसगाव विभागीय पोलीस अधिकारी (DYSP) यांच्या मार्गदर्शनाखाली सुरू असल्याची माहिती पोलिसांकडून देण्यात आली आहे. या घटनेत नेमके काय घडले, कोणाची भूमिका किती होती आणि इतर संबंधित बाबी तपासातून स्पष्ट होणार आहेत. पोलिसांनी प्रकरणाचा तपास सुरू केला असून, तपास पूर्ण झाल्यानंतरच घटनेबाबतची अधिकृत आणि संपूर्ण माहिती समोर येणार आहे. टीप : अल्पवयीन पीडितेची ओळख कायद्यानुसार गोपनीय ठेवण्यात आली आहे.

स्वतःची कहाणी सांगण्यापेक्षा समाजाची कहाणी लिहिण्यातच मला अधिक समाधान मिळतं… काही दिवसांपूर्वी एका व्यक्तीने सहजच मला विचारलं,“सर, तुम्ही तुमचं आत्मचरित्र लिहायला हवं…!” क्षणभर मनात विचार आला आणि मी हसत उत्तर दिलं—“नाही… अजून तरी नाही!” कारण आत्मचरित्र लिहिण्यासाठी केवळ वय वाढणं पुरेसं नसतं; त्यामागे अनुभवांची मोठी शिदोरी, संघर्षांची अनेक पर्वं आणि आयुष्याने दिलेल्या असंख्य शिकवणींचा प्रदीर्घ प्रवास असावा लागतो. आणि खरं सांगायचं तर, मला अजून स्वतःला त्या टप्प्यावर पोहोचलोय असं वाटत नाही. मी स्वतःकडे एखाद्या मोठ्या व्यक्तीच्या नजरेने पाहत नाही.मी अजूनही एक विद्यार्थीच आहे. रोज काहीतरी नवीन पाहतो, काहीतरी नवीन अनुभवतो, काही चांगल्या माणसांकडून शिकतो, काही प्रसंगांकडून धडा घेतो आणि त्या अनुभवांना शब्दांत उतरवण्याचा प्रयत्न करतो. माझ्या आयुष्यात अजून खूप काही करायचं आहे.खूप दूरचा पल्ला गाठायचा आहे.यशाची अनेक शिखरं चढायची आहेत.आणि कदाचित कधीतरी मागे वळून पाहताना वाटेल—“हो… आता या प्रवासाची कहाणी सांगावी!” तो दिवस आला, तर आत्मचरित्राचा विचार नक्की करेन. पण आज मात्र माझं लिखाण माझ्याभोवती फिरत नाही.मला लिहायचं आहे ते समाजाबद्दल… माणसांबद्दल… त्यांच्या जगण्याबद्दल… त्यांच्या वेदनांबद्दल… त्यांच्या स्वप्नांबद्दल आणि कधी कधी आपल्या आजूबाजूला घडणाऱ्या अशा छोट्या-छोट्या गोष्टींबद्दल, ज्या मोठा अर्थ सांगून जातात. माझ्यासाठी लेखन म्हणजे स्वतःची ओळख करून देण्याचं माध्यम नाही;तर समाजाकडे पाहण्याची एक संवेदनशील नजर आहे. आणखी एक गोष्ट मला विशेष आनंद देते… मी स्वतः माझ्याबद्दल किती लिहिलं, यापेक्षा माझं लिखाण वाचून एखाद्या वाचकाने माझ्याबद्दल दोन शब्द लिहिले, एखाद्याने माझ्या विचारांची दखल घेतली किंवा एखाद्याच्या मनाला माझा एखादा शब्द भिडला—हीच माझ्या लेखणीची खरी पोचपावती आहे. कारण लेखकाची खरी ओळख त्याने स्वतः लिहिलेल्या परिचयातून नव्हे,तर त्याच्या शब्दांनी वाचकांच्या मनात निर्माण केलेल्या जागेतून होते. म्हणून आज आत्मचरित्र लिहिण्याची घाई नाही… अजून प्रवास बाकी आहे,अजून शिकणं बाकी आहे,अजून अनुभवायचं आहे,अजून लिहायचं आहे…आणि सर्वात महत्त्वाचं म्हणजे—अजून स्वतःला घडवायचं आहे! कदाचित म्हणूनच आज माझी कथा मी लिहिण्यापेक्षा,माझे शब्दच माझी ओळख लिहीत आहेत… ✍️ एस. के. भिसे(लेखक, कवी)

पोलीस प्रशासनातील कार्याबद्दल संवाद; पुष्पगुच्छ देत करण्यात आला सन्मान जामनेर (प्रतिनिधी) : जामनेर पोलीस ठाण्याचे पोलीस निरीक्षक निवृत्ती बोऱ्हाडे साहेब यांची JBN महाराष्ट्र NEWSच्या टीमने सदिच्छा भेट घेतली. यावेळी पोलीस प्रशासनाच्या विविध विषयांवर तसेच जामनेर शहरातील कायदा व सुव्यवस्था, नागरिकांच्या सुरक्षिततेसाठी सुरू असलेल्या उपाययोजना आणि सामाजिक बांधिलकी याबाबत सकारात्मक संवाद साधण्यात आला. यावेळी JBN महाराष्ट्र NEWS टीमच्या वतीने पोलीस निरीक्षक निवृत्ती बोऱ्हाडे यांना पुष्पगुच्छ व शाल देऊन सदिच्छा व्यक्त करण्यात आली. पोलीस प्रशासन आणि प्रसारमाध्यमे यांच्यातील समन्वयातून नागरिकांपर्यंत अचूक व वस्तुनिष्ठ माहिती पोहोचविण्यास मदत होते, याबाबतही चर्चा झाली. जामनेर शहर व परिसरातील नागरिकांच्या सुरक्षिततेच्या दृष्टीने पोलिसांकडून करण्यात येणाऱ्या उपाययोजना, वाहतूक शिस्त, सामाजिक उपक्रम तसेच विविध घटनांमध्ये पोलिसांची भूमिका याबाबत यावेळी विचारविनिमय करण्यात आला. “पत्रकारिता ही समाज आणि प्रशासन यांच्यातील महत्त्वाचा दुवा आहे. सत्य, वस्तुनिष्ठ आणि जबाबदार पत्रकारितेतून समाजहिताचे प्रश्न प्रभावीपणे मांडले जाऊ शकतात,” अशा भावनेतून या भेटीला सकारात्मक वातावरण लाभले. यावेळी JBN महाराष्ट्र NEWS टीमचे प्रतिनिधी उपस्थित होते. पोलीस प्रशासन आणि माध्यमांमध्ये समन्वय कायम राहावा तसेच जामनेर परिसरातील नागरिकांच्या प्रश्नांना योग्य व्यासपीठ मिळावे, या उद्देशाने भविष्यातही सकारात्मक सहकार्य राहील, अशी अपेक्षा व्यक्त करण्यात आली. JBN महाराष्ट्र NEWS टीमच्या वतीने पोलीस निरीक्षक निवृत्ती बोऱ्हाडे साहेबांना पुढील कार्यासाठी मनःपूर्वक शुभेच्छा देण्यात आल्या.