JBN Maharashtra

जामनेर तालुक्यावर दुष्काळाचे सावट! जनावरांच्या चारा-पाण्याचा प्रश्न ऐरणीवर; प्रशासनाच्या उपाययोजनांकडे शेतकऱ्यांचे लक्ष जामनेर | प्रतिनिधी शेतकऱ्यांच्या डोक्यावर पुन्हा संकटाचे ढग घोंगावू लागले आहेत का? जामनेर तालुक्यात जनावरांच्या चारा-पाण्याच्या प्रश्नावरून चिंता व्यक्त केली जात असून, संभाव्य दुष्काळी परिस्थितीच्या पार्श्वभूमीवर प्रशासनाच्या उपाययोजनांकडे सर्वांचे लक्ष लागले आहे. शेतीसोबतच पशुपालन हा अनेक शेतकरी कुटुंबांच्या उदरनिर्वाहाचा महत्त्वाचा आधार आहे. मात्र, पावसाची स्थिती प्रतिकूल राहिल्यास हिरव्या चाऱ्याची उपलब्धता, जनावरांसाठी पिण्याचे पाणी आणि पशुधनाचा सांभाळ ही मोठी आव्हाने ठरू शकतात. अशा परिस्थितीत शेतकऱ्यांना वेळेत मदत मिळणे आवश्यक आहे. प्रशासनासमोर महत्त्वाचे प्रश्न! 🔹 जनावरांसाठी चारा उपलब्ध करून देण्याचे नियोजन आहे का? 🔹 पाणीटंचाई जाणवणाऱ्या भागांत पिण्याच्या पाण्याची व्यवस्था कशी केली जाणार? 🔹 संभाव्य दुष्काळी परिस्थितीचा आढावा घेऊन पशुपालकांसाठी ठोस उपाययोजना केव्हा राबविणार? 🔹 चारा छावण्या किंवा अन्य मदतीची गरज असल्यास त्याबाबत प्रशासनाचे नियोजन काय आहे? आता तरी ठोस पावले उचलणार का? दुष्काळी परिस्थिती गंभीर होण्याची वाट पाहण्यापेक्षा वेळीच आढावा घेऊन प्रतिबंधात्मक उपाययोजना करणे गरजेचे आहे. जनावरांना चारा-पाणी उपलब्ध करून देण्यासाठी संबंधित विभागांनी परिस्थितीची पाहणी करून आवश्यक नियोजन करावे, अशी अपेक्षा व्यक्त होत आहे. प्रश्न केवळ चारा-पाण्याचा नाही, तर शेतकऱ्यांच्या उदरनिर्वाहाचा आणि त्यांच्या पशुधनाच्या भविष्याचाही आहे! आता जामनेर तालुक्यातील परिस्थितीचा प्रशासन कधी आढावा घेणार आणि शेतकरी-पशुपालकांना दिलासा देण्यासाठी कोणती ठोस पावले उचलणार, याकडे सर्वांचे लक्ष लागले आहे. ✍️ JBN महाराष्ट्र NEWS तुमच्या गावापासून महाराष्ट्रापर्यंत… जनतेचा आवाज!

ज्येष्ठ अभिनेते नाना पाटेकर यांचे निधन; अभिनयाचा एक दमदार अध्याय संपला! मराठी आणि हिंदी चित्रपटसृष्टीतील आपल्या दमदार अभिनयाने, रोखठोक संवादफेकीने आणि असामान्य कलागुणांनी प्रेक्षकांच्या मनावर अधिराज्य गाजवणारे ज्येष्ठ अभिनेते नाना पाटेकर यांचे वयाच्या ७५व्या वर्षी निधन झाले. गोव्यातील निवासस्थानी प्रकृती बिघडल्यानंतर त्यांना रुग्णालयात दाखल करण्यात आले. डॉक्टरांनी त्यांना वाचवण्यासाठी प्रयत्न केले; मात्र त्यांची प्राणज्योत मालवली. त्यांच्या निधनाची पुष्टी त्यांचे पुत्र मल्हार पाटेकर यांनी केली आहे. ‘क्रांतिवीर’, ‘परिंदा’, ‘प्रहार’, ‘अब तक छप्पन’, ‘वेलकम’ यांसारख्या असंख्य चित्रपटांमधून नाना पाटेकर यांनी आपल्या अभिनयाची वेगळी छाप निर्माण केली. पडद्यावरचा त्यांचा आवाज, संवाद आणि व्यक्तिमत्त्व कायमच प्रेक्षकांच्या स्मरणात राहील. JBN महाराष्ट्र NEWS परिवाराच्या वतीने ज्येष्ठ अभिनेते नाना पाटेकर यांना भावपूर्ण श्रद्धांजली! 🙏💐 ईश्वर त्यांच्या आत्म्यास शांती देवो. ✍️ JBN महाराष्ट्र NEWS

संतापजनक प्रकाराने परिसरात खळबळ; दोन संशयित अटकेत, तिसऱ्याचा शोध सुरू यावल | प्रतिनिधी जळगाव जिल्ह्यातील यावल तालुक्यातील दहिगाव येथे माणुसकीला काळिमा फासणारी संतापजनक घटना समोर आली आहे. एका ५० वर्षीय दिव्यांग व्यक्तीला फिरायला नेण्याच्या बहाण्याने विहिरीजवळ नेऊन त्यांना धाक दाखवत त्रास दिल्याचा आणि मारहाण केल्याचा आरोप आहे. या प्रकाराचा मोबाईलवर व्हिडिओ तयार करून तो सोशल मीडियावर प्रसारित करण्यात आल्याने परिसरात संताप व्यक्त होत आहे. नेमकं काय घडलं? दहिगाव येथील पाटील गल्लीतील नामदेव रामदास पाटील (वय ५०) यांनी यावल पोलिसांत दिलेल्या तक्रारीनुसार, २८ सप्टेंबर २०२६ रोजी दुपारी सुमारे दीड ते दोन वाजेच्या दरम्यान काही जण त्यांना घरातून सोबत घेऊन गेले. यानंतर दहिगावपासून अंदाजे एक किलोमीटर अंतरावर असलेल्या नावरा रस्त्यावरील एका विहिरीजवळ त्यांना नेण्यात आले. तक्रारीनुसार, नितीन उर्फ मुन्ना सुनील पाटील (वय २३) आणि पंकज उर्फ झग्या संतोष पाटील (वय २२) यांनी त्यांच्याशी गैरवर्तन करत त्यांना विहिरीच्या कठड्यावरून उलटे लटकवले आणि काही काळ तशाच अवस्थेत ठेवले. या दरम्यान त्यांच्यावर मारहाण करण्यात आल्याचा आरोप असून, त्यांना अपमानास्पद वागणूक देण्यात आली. घटनेचे गांभीर्य एवढ्यावरच थांबले नाही. या संपूर्ण प्रकाराचा व्हिडिओ तिसऱ्या व्यक्तीने मोबाईलमध्ये रेकॉर्ड केल्याचे तक्रारीत नमूद करण्यात आले आहे. व्हिडिओ सोशल मीडियावर प्रसारित घटनेनंतर संबंधित व्हिडिओ सोशल मीडियावर प्रसारित झाल्याने पीडित व्यक्तीची समाजात बदनामी झाल्याचा आरोप आहे. या प्रकारामुळे दहिगावसह परिसरात तीव्र संतापाचे वातावरण निर्माण झाले आहे. दोन संशयित पोलिसांच्या ताब्यात तक्रारीनंतर यावल पोलिसांनी प्रकरणाचे गांभीर्य लक्षात घेत तत्काळ कारवाई केली. या प्रकरणात नितीन उर्फ मुन्ना सुनील पाटील आणि पंकज उर्फ झग्या संतोष पाटील या दोघांना ताब्यात घेण्यात आले आहे. तर व्हिडिओ तयार करणारा तिसरा साथीदार सध्या फरार असून त्याचा शोध सुरू आहे. कठोर कारवाईची मागणी दिव्यांग व्यक्तीसोबत अशा प्रकारे गैरवर्तन करणाऱ्यांवर कठोर कारवाई करण्यात यावी, तसेच अशा प्रकारचे व्हिडिओ सोशल मीडियावर प्रसारित करणाऱ्यांवरही कायदेशीर कारवाई व्हावी, अशी मागणी नागरिकांकडून होत आहे. या प्रकरणाचा पुढील तपास यावल पोलीस ठाण्याचे पोलीस निरीक्षक रंगनाथ धारबळे यांच्या मार्गदर्शनाखाली सहाय्यक पोलीस निरीक्षक अजयकुमार वाढवे करीत आहेत. टीप : वरील आरोप तक्रारीत नमूद माहितीनुसार असून, प्रकरणाचा अंतिम निष्कर्ष पोलिस तपास व न्यायालयीन प्रक्रियेनंतर स्पष्ट होईल. प्रतिनिधी ! कमलेश महेश्री

धरणात केवळ २० टक्के पाणीसाठा; रात्री-दिवस सुरू असल्याचा नागरिकांचा आरोप वाकडी, ता. जामनेर | दि. ७ ऑक्टोबर २०२६ जामनेर तालुक्यातील वाकडी येथील धरणातून रात्री-दिवस मोठ्या प्रमाणावर अवैध पाणीउपसा सुरू असल्याचा आरोप स्थानिक नागरिकांकडून करण्यात येत आहे. धरणात सध्या केवळ २० टक्के पाणीसाठा शिल्लक असल्याने अशाच पद्धतीने पाण्याचा उपसा सुरू राहिला, तर आगामी काळात परिसरातील अनेक गावांना पाणीटंचाईला सामोरे जावे लागू शकते, अशी चिंता नागरिकांनी व्यक्त केली आहे. वाकडी धरणातून वाकडी, राहेरा, तळेगाव, कर्णफाटा आणि कासली या गावांना पाणीपुरवठा केला जातो. त्यामुळे उपलब्ध पाणीसाठ्याचे काटेकोर नियोजन होणे गरजेचे आहे. मात्र, धरणातील पाणीसाठ्यातून विविध मार्गाने चोरट्या पद्धतीने पाणीउपसा केला जात असल्याचा आरोप होत आहे. कारवाई होते, पण पुन्हा उपसा सुरू? यापूर्वीही अवैध पाणीउपसा करणाऱ्यांच्या मोटारी, वायर व इतर साहित्य जप्त करून कारवाई केल्याचे सांगितले जाते. मात्र, कारवाईनंतरही पुन्हा अवैध पाणीउपसा सुरू होत असल्याने प्रशासनाच्या कारवाईवर प्रश्नचिन्ह उपस्थित केले जात आहे. दरम्यान, काही ठिकाणी अवैध आकडे टाकून वीज चोरी केली जात असल्याचाही आरोप नागरिकांकडून करण्यात येत आहे. या प्रकाराकडे वीज वितरण कंपनीचेही दुर्लक्ष होत असल्याची चर्चा आहे. मे-जूनमध्ये पाणीटंचाईची भीती उन्हाळ्याचे मे आणि जून हे महत्त्वाचे महिने अद्याप बाकी आहेत. नागरिकांसोबतच जनावरांनाही पिण्यासाठी पाण्याची आवश्यकता असते. त्यामुळे धरणातील उपलब्ध पाणीसाठा जपणे अत्यंत गरजेचे आहे. सध्याच्या पाणीसाठ्यातून मे महिन्याच्या अखेरपर्यंत पाणी पुरेल, अशी स्थिती असली तरी अवैध पाणीउपसा सुरू राहिल्यास परिस्थिती गंभीर होण्याची शक्यता नागरिकांनी व्यक्त केली आहे. प्रशासन आता काय कारवाई करणार? धरणातून होणाऱ्या अवैध पाणीउपशाची तातडीने पाहणी करून संबंधितांवर कठोर कारवाई करावी, तसेच वीज चोरीच्या प्रकारांचीही चौकशी करावी, अशी मागणी नागरिकांकडून होत आहे. वाकडी धरणाचा पाणीसाठा अनेक गावांसाठी जीवनवाहिनी असताना, या पाण्यावर डल्ला मारणाऱ्यांवर प्रशासन ठोस कारवाई करणार का? याकडे आता परिसरातील नागरिकांचे लक्ष लागले आहे.

इंदिराबाई ललवाणी विद्यालयाच्या विद्यार्थिनीची नाशिक विभागीय स्पर्धेसाठी निवड जामनेर, दि. ४ ऑक्टोबर : महाराष्ट्र राज्य क्रीडा व युवक सेवा संचालनालय, पुणे, जिल्हा क्रीडा अधिकारी कार्यालय, जळगाव तसेच जळगाव जिल्हा बुद्धिबळ संघटनेच्या संयुक्त विद्यमाने जिल्हास्तरीय शालेय बुद्धिबळ स्पर्धेचे आयोजन करण्यात आले होते. दि. ३ व ४ ऑक्टोबर रोजी जळगाव येथील काशिनाथ पलोड पब्लिक स्कूल येथे या स्पर्धा पार पडल्या. या स्पर्धेत इंदिराबाई ललवाणी माध्यमिक व उच्च माध्यमिक विद्यालयाची इयत्ता ११ वी विज्ञान शाखेतील विद्यार्थिनी कु. चेतना निलेश पाटील हिने १७ वर्षांखालील मुलींच्या गटात उत्कृष्ट कामगिरी करत चतुर्थ क्रमांक पटकावला. या उल्लेखनीय कामगिरीच्या जोरावर तिची शालेय नाशिक विभागीयस्तरीय बुद्धिबळ स्पर्धेसाठी निवड झाली आहे. नाशिक विभागीयस्तरीय स्पर्धा दि. ५ ऑक्टोबर रोजी बिटको कॉलेज, नाशिक येथे होणार असून, या स्पर्धेसाठी चेतना पाटीलचे सर्व स्तरातून अभिनंदन होत आहे. यावेळी जळगाव जिल्हा बुद्धिबळ संघटनेचे राष्ट्रीय ऑर्बिटर प्रवीण ठाकरे तसेच ऑर्बिटर अभिषेक जाधव यांनी चेतना पाटील हिला शुभेच्छा दिल्या. याप्रसंगी क्रीडा शिक्षक प्रा. समीर घोडेस्वार आदी उपस्थित होते. चेतना पाटीलच्या या यशाबद्दल इंदिराबाई ललवाणी शैक्षणिक संकुल संस्थेचे अध्यक्ष श्री. राजेंद्र भाऊ महाजन, सचिव श्री. किशोर भाऊ महाजन, सर्व संचालक मंडळ, मुख्याध्यापक श्री. एस. आर. चव्हाण, उपमुख्याध्यापक श्री. एस. एन. चवरे, उपप्राचार्य प्रा. डी. झेड. गायकवाड, पर्यवेक्षक श्री. जी. जी. अत्तरदे व श्री. व्ही. बी. पाटील यांनी तिचे अभिनंदन करून विभागीय स्पर्धेसाठी शुभेच्छा दिल्या. या यशासाठी क्रीडा विभाग प्रमुख श्री. जी. सी. पाटील, श्री. बी. पी. बेनाडे, श्री. गजानन कचरे तसेच क्रीडा शिक्षक प्रा. समीर घोडेस्वार यांचे मोलाचे मार्गदर्शन लाभले.

दोन जिवंत काडतुसे जप्त; यावल पोलिसांत आर्म्स ॲक्टनुसार गुन्हा दाखल यावल : आगामी सण-उत्सवांच्या पार्श्वभूमीवर कायदा व सुव्यवस्था अबाधित ठेवण्यासाठी पोलिसांकडून गुन्हेगारांची तपासणी आणि गस्त वाढविण्यात आली आहे. याच कारवाईदरम्यान किणगाव येथे यावल पोलिस व स्थानिक गुन्हे शाखा, जळगाव यांच्या पथकाने एका २५ वर्षीय तरुणाला देशी बनावटीचे पिस्तूल व दोन जिवंत काडतुसांसह ताब्यात घेतले. ही कारवाई किणगाव गावात करण्यात आली. संशयित तरुणाकडून पिस्तूल व दोन जिवंत काडतुसे असा मुद्देमाल जप्त करून त्याला यावल पोलिस ठाण्यात आणण्यात आले. त्याच्याविरुद्ध आर्म्स ॲक्टच्या संबंधित कलमांनुसार गुन्हा दाखल करण्यात आला आहे. आगामी सण-उत्सवांच्या काळात कोणताही गंभीर गुन्हा घडू नये, यासाठी यावल पोलिस ठाण्याच्या हद्दीत नाकाबंदी, सखोल पेट्रोलिंग तसेच संशयित व्यक्ती आणि गुन्हेगारांची तपासणी करण्याच्या सूचना वरिष्ठ पोलिस अधिकाऱ्यांनी दिल्या आहेत. जळगाव जिल्हा पोलिस अधीक्षक श्रीकांत धिवरे, अपर पोलिस अधीक्षक संदीप गावित तसेच फैजपूरचे डीवायएसपी अनिल बळगुजर यांच्या मार्गदर्शनाखाली ही कारवाई करण्यात आली.पिस्तूल व जिवंत काडतुसे आढळून आल्याने या कारवाईमुळे यावल तालुक्यात खळबळ उडाली असून, पोलिसांकडून पुढील तपास सुरू आहे.

पुणे | प्रतिनिधी : अग्रीस्टॅक उपक्रमांतर्गत शेतकरी नोंदणीसाठी तयार करण्यात येणाऱ्या डिजिटल Farmer ID बाबत महाराष्ट्र शासनाच्या कृषी विभागाने महत्त्वाचे निर्देश जारी केले आहेत. शेतकऱ्यांचे Farmer ID कार्ड परवानगीशिवाय छापणे, त्याची प्रत तयार करणे किंवा वितरित करणे हा गंभीर प्रकार असल्याचे विभागाने स्पष्ट केले आहे. कृषी विभागाच्या २४ सप्टेंबर २०२५ रोजीच्या पत्रानुसार, भारत सरकारच्या अग्रीस्टॅक उपक्रमांतर्गत शेतकरी नोंदणीची प्रक्रिया राबविण्यात येत असून, त्यासाठी डिजिटल Farmer ID तयार करण्यात येत आहे. मात्र, काही ठिकाणी CSC/सेवा केंद्रे तसेच संबंधित संस्थांकडून शेतकऱ्यांना Farmer ID चे भौतिक अथवा ऑफलाइन कार्ड देण्यात येत असल्याचे निदर्शनास आले आहे. केंद्र शासनाच्या कृषी व शेतकरी कल्याण मंत्रालयाच्या निर्देशांचा हवाला देत कृषी विभागाने स्पष्ट केले आहे की, अॅग्रीस्टॅक अंतर्गत कोणतेही भौतिक किंवा ऑफलाइन Farmer ID कार्ड अधिकृतपणे मान्य करण्यात आलेले नाही. अनधिकृत कार्डपासून सावध राहण्याचे आवाहन परवानगीशिवाय Farmer ID कार्ड तयार करणे, छापणे, वितरित करणे किंवा त्याची प्रत प्रसारित करणे यामुळे गैरवापराची शक्यता निर्माण होऊ शकते. त्यामुळे अशा प्रकारच्या अनधिकृत प्रक्रियांपासून शेतकऱ्यांनी सावध राहावे, असे आवाहन कृषी विभागाने केले आहे. या संदर्भात व्हॉट्सॲप संदेश, वृत्तपत्रे, दवंडी तसेच इतर स्थानिक माध्यमांतून व्यापक जनजागृती करण्याचे निर्देश संबंधित यंत्रणांना देण्यात आले आहेत. शेतकऱ्यांनी Farmer ID संदर्भात कोणत्याही व्यक्ती किंवा संस्थेकडून अनधिकृत छापील कार्ड अथवा त्याची प्रत स्वीकारण्यापूर्वी योग्य ती खात्री करावी. Farmer ID बाबत अधिकृत माहिती व प्रक्रियेसाठी संबंधित कृषी विभागाचे कार्यालय किंवा अधिकृत यंत्रणेशी संपर्क साधावा, असे आवाहन करण्यात आले आहे. — जे बी एन महाराष्ट्र न्यूज

‘निरोगी उद्यासाठी आयुर्वेद’ विषयावरील निबंध व वक्तृत्व स्पर्धेतील विजेत्यांचा मान्यवरांच्या हस्ते सत्कार जामनेर : जामनेर येथील ज्ञानगंगा माध्यमिक व कनिष्ठ महाविद्यालयात सेवा संकल्प अभियानांतर्गत विविध उपक्रमांचे आयोजन करण्यात आले. या अभियानाच्या माध्यमातून विद्यार्थ्यांमध्ये आरोग्यविषयक जनजागृती निर्माण करण्याच्या उद्देशाने ‘निरोगी उद्यासाठी आयुर्वेद’ या विषयावर निबंध व वक्तृत्व स्पर्धा घेण्यात आली. या स्पर्धेत उत्कृष्ट कामगिरी करणाऱ्या विद्यार्थ्यांचा प्रमाणपत्र व ट्रॉफी देऊन गौरव करण्यात आला. कार्यक्रमाची सुरुवात जामनेर नगर परिषदेच्या नगराध्यक्षा सौ. साधनाताई महाजन यांच्या शुभहस्ते माता सरस्वतीच्या प्रतिमेचे पूजन करून करण्यात आली. यावेळी नगर परिषदेचे उपनगराध्यक्ष डॉ. प्रशांत बोंडे, श्री. के. बी. माळी, विद्यालयाचे प्राचार्य श्री. राजेंद्र सोनवणे, तालुका वैद्यकीय अधिकारी डॉ. राजेश सोनवणे, उपजिल्हा रुग्णालय जामनेरचे वैद्यकीय अधीक्षक डॉ. हर्षल चांदा, तसेच डॉ. जितेंद्र वानखेडे, डॉ. चंद्रमणी सुरवाडे, डॉ. धनंजय पाटील, डॉ. निलेश चव्हाण, डॉ. पंकज पाटील, अमोल सोनवणे, सलमा तडवी, मोनाली सावळे, हर्षा गवळे, अनिता बडगुजर यांच्यासह आर.बी.एस.के. पथकातील अधिकारी व कर्मचारी उपस्थित होते. दि. १७ सप्टेंबर ते १७ ऑक्टोबर २०२६ या कालावधीत सेवा संकल्प अभियानांतर्गत सदर स्पर्धांचे आयोजन करण्यात आले. मा. जिल्हा आरोग्य अधिकारी, जिल्हा परिषद जळगाव यांच्या मार्गदर्शनाखाली तालुका वैद्यकीय अधिकारी, जामनेर यांच्या माध्यमातून हा उपक्रम राबविण्यात आला. इयत्ता ८ वी ते १२ वी पर्यंतच्या विद्यार्थ्यांनी निबंध व वक्तृत्व स्पर्धेत उत्स्फूर्त सहभाग नोंदविला. ‘निरोगी उद्यासाठी आयुर्वेद’ या विषयावर विद्यार्थ्यांनी आयुर्वेदाचे महत्त्व, निरोगी जीवनशैली, पारंपरिक उपचारपद्धती आणि आरोग्य संवर्धन याबाबत आपले विचार प्रभावीपणे मांडले. स्पर्धेत प्रथम, द्वितीय व तृतीय क्रमांक मिळविणाऱ्या विद्यार्थ्यांना प्रमाणपत्र व ट्रॉफी देऊन मान्यवरांच्या हस्ते गौरविण्यात आले. विद्यार्थ्यांच्या कलागुणांना प्रोत्साहन मिळावे आणि आरोग्यविषयक जागरूकता वाढावी, या उद्देशाने आयोजित केलेल्या या उपक्रमाचे उपस्थितांकडून कौतुक करण्यात आले. कार्यक्रमाचे सूत्रसंचालन श्री. विलास पाटील सर यांनी केले, तर आभार प्रदर्शन श्री. विजय कोळी सर यांनी केले. या उपक्रमामुळे विद्यार्थ्यांना आपल्या आरोग्याबाबत जागरूक राहण्यासोबतच आयुर्वेदाच्या महत्त्वाची माहिती मिळाली.

✍️ एकमन संतोष भिसे,📰 JBN महाराष्ट्र NEWS | विशेष लेख आयुष्य म्हणजे एक पुस्तकच आहे…काही पानं आनंदाने भरलेली, काही आठवणींनी सजलेली, तर काही पानं अश्रूंनी भिजलेली.कधी कधी आयुष्यात असा प्रसंग येतो, की आपल्याला वाटतं—“बस्स… आता सगळं संपलं!”एखादं नातं तुटतं, एखादं स्वप्न अपूर्ण राहतं, अपयश पदरी पडतं किंवा एखादी व्यक्ती कायमची दूर जाते… आणि आपण त्या एका प्रसंगालाच आपल्या संपूर्ण आयुष्याचा शेवट समजतो.पण खरं पाहिलं तर…एक पान संपतं, पुस्तक नाही!जखम झाली म्हणून प्रवास थांबत नाही.अपयश आलं म्हणून स्वप्न संपत नाही.कोणी सोडून गेलं म्हणून आयुष्य रिकामं होत नाही.काही माणसं आपल्या आयुष्यात येतात, काही शिकवून जातात आणि काही न सांगता निघून जातात. त्यांच्या जाण्याने निर्माण झालेली पोकळी काही काळ असह्य वाटते; पण काळ पुढे सरकत राहतो आणि आयुष्याची नवी पानं उघडत राहतात.आपली अडचण एवढीच असते की आपण जुन्या पानावरच थांबतो.तेच दुःख पुन्हा पुन्हा आठवतो…त्याच चुका पुन्हा पुन्हा मनात आणतो…आणि मग स्वतःलाच सांगतो—“माझ्यासाठी आता काही उरलेलं नाही.”पण आयुष्य हळूच सांगत असतं—“थांबू नकोस… अजून पुढची पानं बाकी आहेत!”कदाचित पुढच्या पानावर एखादी नवी संधी तुमची वाट पाहत असेल.कदाचित एखादं अपूर्ण स्वप्न पूर्ण होणार असेल.कदाचित एखादी व्यक्ती तुमच्या आयुष्यात येऊन जुन्या जखमांवर प्रेमाचा हात ठेवणार असेल.आणि कदाचित एक दिवस तुम्ही मागे वळून पाहाल आणि म्हणाल—“ज्याला मी माझ्या आयुष्याचा शेवट समजलो होतो, तोच माझ्या नव्या सुरुवातीचा क्षण होता!”म्हणून आयुष्याच्या एखाद्या पानावर दुःख लिहिलं असेल, तर पुस्तक बंद करू नका.पान उलटा…कारण तुमची कथा अजून पूर्ण झालेली नाही.आज परिस्थिती कठीण असेल, आज मन उदास असेल, आज सगळं चुकीचं वाटत असेल… तरीही उद्याचं पान तुमच्या हातात आहे.शेवटचा अध्याय अजून लिहिलेला नाही.आणि कधी कधी…आयुष्याची सगळ्यात सुंदर गोष्ट शेवटच्या पानावरच लिहिली जाते!✍🏻 शब्दांकन : एकमन संतोष भिसेJBN महाराष्ट्र NEWS“अभिव्यक्ती स्वातंत्र्य, न्याय व हक्क”तुमच्या गावापासून महाराष्ट्रापर्यंत…

जामनेर | JBN महाराष्ट्र NEWS 🎙️ जामनेरमध्ये रोजगार महाकुंभ मेळावा उत्साहात संपन्न! भारताचे माननीय पंतप्रधान श्री नरेंद्र मोदी यांच्या वाढदिवसानिमित्त जामनेर येथे रोजगाराच्या संधी उपलब्ध करून देण्यासाठी रोजगार महाकुंभ मेळाव्याचे आयोजन करण्यात आले. श्रीमंत राघोजी बाबा मंगल कार्यालय, जामनेर येथे २९ सप्टेंबर २०२६ रोजी जिल्हा कौशल्य रोजगार उद्योजकता व नाविन्यता विभाग, जळगाव आणि स्वर्गीय हरिभाऊ रामकृष्ण बारी शासकीय औद्योगिक प्रशिक्षण संस्था, जामनेर यांच्या संयुक्त विद्यमाने हा मेळावा पार पडला. या रोजगार मेळाव्याचे उद्घाटन जामनेर शहर पोलीस स्टेशनचे पोलीस निरीक्षक श्री. निवृत्ती बोराडे साहेब यांच्या हस्ते करण्यात आले. या मेळाव्याला व्यासपीठावर जामनेर शहरातील श्री जितू भाऊ पाटील ,श्री चंद्रकांत बाविस्कर, श्री.महेन्द्र बाविस्कर,श्री रविंद्र झाल्टे ,श्री दिपक तायडे (मंत्री महोदय मा.ना. श्री गिरीषजी महाजन यांचे स्विय सहायक) यांच्या सह विविध लोकप्रतिनिधी उपस्थित होते. कार्यक्रमाच्या अध्यक्षस्थानी संस्थेचे प्राचार्य श्री. आर. टी. चौधरी होते. तर जिल्हा कौशल्य रोजगार विभागाच्या सौ. निशा भोई मॅडम विशेष अतिथी म्हणून उपस्थित होत्या. यावेळी विविध लोकप्रतिनिधी, मान्यवर आणि विद्यार्थी मोठ्या संख्येने उपस्थित होते. उद्घाटनपर मार्गदर्शन करताना पोलीस निरीक्षक निवृत्ती बोराडे यांनी विद्यार्थ्यांना व्यसनांपासून दूर राहण्याचे आणि वाहतुकीचे नियम तंतोतंत पाळण्याचे आवाहन केले. लोकप्रतिनिधी श्री. चंद्रकांत बाविस्कर यांनी विद्यार्थ्यांनी कौशल्य विकासावर भर देण्याचे आवाहन केले. तर आयएमसी सदस्य श्री. कर्णबारी यांनी सुशिक्षित बेरोजगार उमेदवार आणि उद्योग क्षेत्रामधील असलेली कौशल्याची दरी दूर करण्याची गरज व्यक्त केली. अध्यक्षीय भाषणात प्राचार्य श्री. चौधरी सर यांनी संस्थेमार्फत राबविण्यात येणाऱ्या विविध उपक्रमांची माहिती देत, विद्यार्थ्यांनी उद्योग क्षेत्रात काम करण्यासाठी आवश्यक कौशल्य आत्मसात करण्याचे आवाहन केले. या रोजगार महाकुंभ मेळाव्यात तब्बल १९ विविध आस्थापनांनी सहभाग घेतला. मेळाव्यासाठी एकूण २८३ उमेदवारांनी हजेरी नोंदवली. त्यापैकी १४९ उमेदवारांची प्राथमिक निवड, तर १११ उमेदवारांची अंतिम निवड करण्यात आली. कार्यक्रमाचे सूत्रसंचालन श्री. प्रांजल जोशी यांनी केले, तर प्रास्ताविक सौ. शुभांगी बर्वे मॅडम यांनी केले. हा रोजगार मेळावा यशस्वी करण्यासाठी संस्थेतील अधिकारी, कर्मचारी आणि सर्व सहकाऱ्यांनी अहोरात्र परिश्रम घेतले. श्री. फेकरीकर साहेब यांच्या मार्गदर्शनाखाली गट निदेशक श्री. नितीन चौधरी, श्री. व्ही. बी. सूर्यवंशी, श्री. बेलदार, आर. बी. पाटील, विनोद चौधरी, वाघ, जगदाळे, पजई, डांगे, शुभांगी बर्वे, कदम, पतंगे, धनगर, नारखेडे, खोडपे, योगेश्वर पाटील, मनीष पाटील, रूपाली पाटील, बढे, जे. डी. पाटील, हर्षदा इंगळे, एम. एम. पाटील, दत्तू सोनवणे, जंगले, रिंकल पाटील, आर. आर. पाटील, व्यंकटेश माळी, झाल्टे, खुरपडे यांच्यासह संस्थेतील सर्व कर्मचारी आणि सहकाऱ्यांनी कार्यक्रमाच्या यशस्वीतेसाठी मोलाचे योगदान दिले. जामनेरच्या युवकांना रोजगाराच्या नव्या संधी उपलब्ध करून देणारा हा रोजगार महाकुंभ मेळावा ठरला, आणि कौशल्य विकासासोबतच उद्योग व उमेदवार यांच्यातील दुवा मजबूत करण्याच्या दिशेने एक महत्त्वाचे पाऊल ठरले. जिल्हा कौशल्य विकास, रोजगार व उद्योजकता मार्गदर्शन केंद्र, जळगाव, जामनेर रेवा गुजर मंडळ आणि संबंधित संस्थांच्या संयुक्त विद्यमाने श्रीमंत बाबाजीराव पाटील मंगल कार्यालय, जामनेर येथे या रोजगार मेळाव्याचे आयोजन करण्यात आले होते. या मेळाव्यात विविध कंपन्यांनी सहभाग घेत टेक्निशियन, फिट्टर, मशीन ऑपरेटर, सुपरवायझर, ट्रेनी, डिझाईन इंजिनिअर, मेंटेनन्स मॅनेजर, प्रोडक्शन इंजिनिअर, हेल्पर, सेल्स एक्झिक्युटिव्ह, सर्व्हिस अॅडव्हायझर यासह विविध पदांसाठी उमेदवारांच्या मुलाखती घेतल्या. १०वी, १२वी, ITI, डिप्लोमा आणि पदवीधर उमेदवारांसाठी विविध रोजगाराच्या संधी या मेळाव्यात उपलब्ध करून देण्यात आल्या होत्या. या उपक्रमामुळे जामनेर आणि परिसरातील रोजगाराच्या शोधात असलेल्या अनेक युवक-युवतींना कंपन्यांशी थेट संपर्क साधण्याची आणि रोजगाराच्या संधी मिळवण्याची संधी मिळाली. 🎙️ JBN महाराष्ट्र NEWSचा सवाल नाही, तर सकारात्मक बातमी—रोजगारासाठी तरुणांना शहराबाहेर भटकंती करण्याची वेळ कमी व्हावी आणि स्थानिक पातळीवरच अधिकाधिक रोजगाराच्या संधी उपलब्ध व्हाव्यात, हीच अपेक्षा! JBN महाराष्ट्र NEWS — तुमच्या गावापासून महाराष्ट्रापर्यंत…