Maharashtra

शेंदुर्णीजवळ टायर फुटल्याने वाहनावरील नियंत्रण सुटल्याची प्राथमिक माहिती; पोषण आहाराच्या गोण्यांसह हमाल रस्त्यावर फेकले गेल्याचे वृत्त जामनेर : जामनेर-पहूर मार्गावर शेंदुर्णीजवळ मंगळवार, दि. १५ सप्टेंबर २०२६ रोजी शालेय पोषण आहाराचे साहित्य घेऊन जाणाऱ्या ४०७ टेम्पोचा भीषण अपघात झाला. या दुर्घटनेत वाहनासोबत असलेल्या दोन हमालांचा जागीच मृत्यू झाल्याचे प्राथमिक वृत्त आहे. अपघातानंतर परिसरात काही काळ गोंधळाचे वातावरण निर्माण झाले होते. मिळालेल्या प्राथमिक माहितीनुसार, संबंधित ४०७ टेम्पोमध्ये शालेय पोषण आहाराच्या गोण्या भरून नेण्यात येत होत्या. शेंदुर्णीजवळ वाहनाचा टायर अचानक फुटल्याने चालकाचे वाहनावरील नियंत्रण सुटल्याचे सांगण्यात येत आहे. त्यानंतर टेम्पो रस्त्यावर उलटला. अपघाताची तीव्रता एवढी होती की वाहनातील पोषण आहाराच्या गोण्यांसह दोन हमाल बाहेर फेकले गेल्याची माहिती समोर आली आहे. या दुर्घटनेत दोघांचा जागीच मृत्यू झाल्याचे सांगण्यात येत आहे. मात्र, अपघाताचे नेमके कारण, मृतांची ओळख आणि इतर तपशीलांची अधिकृत माहिती पोलिसांच्या पंचनामा व तपासानंतरच स्पष्ट होणार आहे. गोण्यांवर बसून प्रवास केल्याची माहिती अपघातानंतर सर्वाधिक गंभीर बाब समोर आली ती म्हणजे वाहनातील दोन हमाल पोषण आहाराच्या गोण्यांवर बसून प्रवास करत असल्याची माहिती. मालवाहू वाहनामध्ये कामगारांना अशा प्रकारे बसवून नेण्यात आले होते का, याचा तपास होणे आवश्यक आहे. जर तपासामध्ये हमालांना मालाच्या गोण्यांवर बसवून नेल्याचे स्पष्ट झाले, तर त्यांच्या सुरक्षिततेबाबत गंभीर प्रश्न निर्माण होऊ शकतो. मालवाहू वाहनात प्रवास करणाऱ्या व्यक्तींसाठी सुरक्षित व्यवस्था करण्यात आली होती का, त्यांना अधिकृत आसनव्यवस्था होती का आणि वाहतूकदाराकडून सुरक्षेच्या नियमांचे पालन करण्यात आले होते का, याची चौकशी होणे गरजेचे आहे. शासकीय पोषण आहाराच्या वाहतुकीवरही प्रश्नचिन्ह या अपघातामुळे केवळ वाहनचालकाची जबाबदारी नव्हे, तर शालेय पोषण आहाराच्या वाहतुकीची संपूर्ण कार्यपद्धती तपासण्याची गरज निर्माण झाली आहे. संबंधित वाहनातून पोषण आहार नेमका कुठून कुठे पाठविण्यात येत होता, त्यासाठी वाहतूक आदेश कोणी दिला होता, संबंधित वाहनाची नियुक्ती कशा पद्धतीने करण्यात आली होती आणि वाहतूकदाराला कोणत्या अटी व नियम लागू करण्यात आले होते, याची पडताळणी होणे आवश्यक आहे. हा पोषण आहार पाचोरा येथून पाठविण्यात आल्याची प्राथमिक माहिती आहे. त्यामुळे माल कुठून उचलण्यात आला, कोणत्या शाळा किंवा वितरण केंद्रांसाठी तो पाठविण्यात आला होता, मालाचे प्रमाण किती होते आणि त्या वाहतुकीसाठी अधिकृत कागदपत्रे कोणती होती, याचीही चौकशी होण्याची शक्यता आहे. वाहनाच्या कागदपत्रांसह तांत्रिक तपासाची गरज अपघाताचे प्राथमिक कारण टायर फुटणे सांगितले जात असले, तरी टायर फुटण्यामागील नेमके कारण काय होते, याचाही तांत्रिक तपास आवश्यक आहे. वाहनाची यांत्रिक स्थिती, टायरची अवस्था, ब्रेक व इतर यंत्रणा, वाहनाची फिटनेस स्थिती, वाहनावर असलेले वजन आणि वाहनाचा वेग या सर्व बाबी तपासल्यानंतरच अपघातामागील नेमकी कारणे स्पष्ट होऊ शकतील. त्याचबरोबर वाहनाची आरसी, विमा, फिटनेस प्रमाणपत्र, परमिट तसेच चालकाचा परवाना वैध होता का, याचीही तपासणी होणे आवश्यक आहे. वाहनाच्या क्षमतेपेक्षा अधिक माल वाहून नेण्यात आला होता का, याचाही तपास महत्त्वाचा ठरणार आहे. दोन कुटुंबांवर दुःखाचा डोंगर या दुर्घटनेत दोन हमालांचा जीव गेल्याने त्यांच्या कुटुंबीयांवर दुःखाचा डोंगर कोसळला आहे. रोजंदारीवर काम करून कुटुंबाचा उदरनिर्वाह करणाऱ्या या कामगारांचा अशा दुर्घटनेत मृत्यू झाल्याने त्यांच्या कुटुंबाच्या भवितव्याचा प्रश्नही निर्माण झाला आहे. संबंधित कुटुंबांना शासनाकडून किंवा संबंधित यंत्रणेकडून मदत मिळणार का, याकडेही आता लक्ष लागले आहे. वाहतूक सुरक्षेचा मुद्दा ऐरणीवर जामनेर-पहूर मार्गावर घडलेल्या या दुर्घटनेमुळे मालवाहतूक करणाऱ्या वाहनांमध्ये कामगारांच्या सुरक्षिततेचा प्रश्न पुन्हा ऐरणीवर आला आहे. मालवाहू वाहनामध्ये कामगारांना सुरक्षिततेच्या नियमांकडे दुर्लक्ष करून प्रवास करावा लागत असेल, तर भविष्यात अशा दुर्घटना टाळण्यासाठी संबंधित विभागाने कठोर पावले उचलण्याची गरज आहे. दरम्यान, या प्रकरणात पोलिसांकडून पंचनामा व तपासाची प्रक्रिया करण्यात येत असून, अपघाताचे नेमके कारण आणि दुर्घटनेसाठी कोणाची जबाबदारी निश्चित होते, हे तपासानंतरच स्पष्ट होणार आहे.

5 किलो 352 ग्रॅम गांजा जप्त; शिंगाईत परिसरातील संशयिताविरुद्ध NDPS कायद्यान्वये गुन्हा जामनेर : प्रतिनिधी JBN NEWS जामनेर पोलिसांनी अमली पदार्थांच्या अवैध विक्रीविरोधात मोठी कारवाई करत 5 किलो 352 ग्रॅम वजनाचा गांजा जप्त केला आहे. जप्त केलेल्या गांजाची किंमत 2 लाख 94 हजार 360 रुपये असल्याची माहिती पोलिसांनी दिली. ही कारवाई 14 सप्टेंबर 2026 रोजी मिळालेल्या गोपनीय माहितीच्या आधारे करण्यात आली. पोलिसांनी दिलेल्या माहितीनुसार, जामनेर पोलीस ठाण्याच्या पथकाला शिंगाईत शिवारात गांजाची विक्री होत असल्याची गोपनीय माहिती मिळाली होती. त्यानुसार पोलिसांनी सापळा रचून जामनेर–भुसावळ रोडवरील सुशीला एजन्सीजवळील रामा हॉटेल परिसरात कारवाई केली. या कारवाईदरम्यान पोलिसांनी हिरवट-तपकिरी रंगाचा पाने, फुले व बिया असलेला 5 किलो 352 ग्रॅम गांजा जप्त केला. या गांजाची बाजारातील किंमत 2,94,360 रुपये असल्याचे नमूद करण्यात आले आहे. या प्रकरणात भगवान हिरामन सूर्यवंशी, रा. शिंगाईत, ता. जामनेर याच्या ताब्यातून गांजा मिळून आल्याचे पोलिसांच्या प्रेस नोटमध्ये नमूद आहे. पोलिसांची चाहूल लागताच संशयिताने अंधाराचा फायदा घेत पळून जाण्याचा प्रयत्न केल्याचेही पोलिसांनी सांगितले. संबंधित व्यक्ती गांजा स्वतःच्या ताब्यात ठेवून ग्राहकांना नशेसाठी विक्री करीत असल्याचे तपासात निष्पन्न झाल्याचे पोलिसांनी नमूद केले आहे. या प्रकरणी संबंधित आरोपीविरुद्ध NDPS कायदा 1985 मधील कलम 8(C) व 20(B) अन्वये गुन्हा दाखल करण्यात आला आहे. जप्त करण्यात आलेल्या गांजाची मोठी किंमत लक्षात घेता जामनेर पोलिसांची ही कारवाई महत्त्वपूर्ण मानली जात आहे. वरिष्ठांच्या मार्गदर्शनाखाली कारवाई ही कारवाई जळगाव जिल्हा पोलीस अधीक्षक श्रीकांत धिवरे, अपर पोलीस अधीक्षक अशोक नखाते तसेच पाचोरा उपविभागीय पोलीस अधिकारी बापू रोहम यांच्या मार्गदर्शनाखाली करण्यात आली. कारवाईमध्ये पोलीस निरीक्षक निवृत्ती बोऱ्हाडे, स.पो.नि. स्वप्निल शिंदे, पोलीस उपनिरीक्षक अशोक कोकाटे, पोहेकॉ/358 उमेश चौधरी, पोको/2103 सचिन महाजन, पोको/1730 योगेश पाटील, पोको/3235 विशाल लाड आणि पोको/2295 अनमोल पाटील यांच्या पथकाने सहभाग घेतला. जामनेर पोलिसांच्या या कारवाईमुळे शहर व परिसरातील अमली पदार्थांच्या अवैध विक्रीविरोधात पोलिसांची करडी नजर असल्याचे स्पष्ट झाले आहे. आगामी काळातही अवैध धंदे व अमली पदार्थांच्या विक्रीविरोधातील कारवाई अधिक तीव्र होण्याची शक्यता आहे.

गणेश स्थापनेच्या गर्दीत वाहतूक सुरळीत ठेवण्यासाठी पोलीस निरीक्षक बोऱ्हाडे स्वतः रस्त्यावर; रात्री उशिरापर्यंत अवैध धंद्यांवरही कारवाई जामनेर : सण-उत्सव म्हटला की सर्वसामान्य नागरिकांच्या आनंदाला आणि उत्साहाला उधाण येते. मात्र, याच काळात नागरिकांना कोणताही अडथळा निर्माण होऊ नये, वाहतूक सुरळीत राहावी आणि कायदा-सुव्यवस्था अबाधित राहावी, यासाठी पोलीस यंत्रणा अहोरात्र कार्यरत असते. पोलिसांची ही धावपळ आपण अनेकदा ऐकतो; मात्र त्यामागची मेहनत प्रत्यक्ष पाहिली की पोलिसांच्या कर्तव्यनिष्ठेला सलाम करावासा वाटतो. जामनेर शहरात गणेश स्थापनेच्या निमित्ताने मंगळवारी विविध ठिकाणी नागरिकांची मोठी गर्दी झाली होती. या गर्दीमुळे वाहतुकीला अडथळा निर्माण होऊ नये आणि गणेशभक्तांना कोणताही त्रास होऊ नये, यासाठी जामनेर पोलीस ठाण्याचे नव्याने रुजू झालेले पोलीस निरीक्षक निवृत्ती भिमराव बोऱ्हाडे हे स्वतः रस्त्यावर उतरून पोलीस कर्मचाऱ्यांसोबत कर्तव्य बजावताना दिसून आले. एकीकडे रस्त्यावरील गर्दी आणि वाहतूक सुरळीत करण्याची जबाबदारी पार पाडत असतानाच दुसरीकडे शहराबाहेरील एका हॉटेलमध्ये अवैधरित्या गांजा विक्री होत असल्याची माहिती पोलिसांना मिळाली. त्यानंतर पोलिसांनी तातडीने संबंधित ठिकाणी धाड टाकून कारवाई केली. या कारवाईनंतर रात्री उशिरापर्यंत पोलीस ठाण्यात गुन्हा दाखल करण्याची प्रक्रिया सुरू होती. सण-उत्सवाच्या काळात नागरिक आपल्या कुटुंबीयांसोबत आनंद साजरा करत असताना, पोलीस मात्र आपले कर्तव्य पार पाडण्यासाठी घरापासून दूर असतात. त्यांच्या कुटुंबीयांना त्यांची वाट पाहत असतानाही नागरिकांची सुरक्षा आणि कायदा-सुव्यवस्था यालाच प्राधान्य दिले जाते. “सदरक्षणाय खलनिग्रहणाय” या पोलीस दलाच्या ब्रीदवाक्याप्रमाणेच सज्जनांचे रक्षण आणि समाजकंटकांचा बंदोबस्त करण्याचे काम पोलीस यंत्रणा करताना दिसत आहे. जामनेर पोलिसांची ही कर्तव्यनिष्ठा आणि अहोरात्र सुरू असलेली धावपळ निश्चितच कौतुकास्पद आहे. गणेशोत्सवातील नागरिकांचा आनंद अबाधित ठेवण्यासाठी स्वतः रस्त्यावर उतरलेले पोलीस निरीक्षक बोऱ्हाडे आणि त्यांचे सहकारी पोलीस कर्मचारी यांचे कार्य खरोखरच सलाम करण्यासारखे आहे.

हद्दपार गुन्हेगारासह ५५ जणांवर कारवाई; ११ अजामीनपात्र वॉरंट तामील पाचोरा : आगामी गणेशोत्सव शांततेत व निर्विघ्नपणे पार पडावा तसेच शहरातील कायदा व सुव्यवस्था अबाधित राहावी, यासाठी पाचोरा पोलिसांनी सराईत व रेकॉर्डवरील गुन्हेगारांविरुद्ध धडक कारवाई सुरू केली आहे. त्याचाच एक भाग म्हणून रविवारी पहाटे ३ ते सकाळी ६.३० वाजेपर्यंत पाचोरा शहर तसेच ग्रामीण हद्दीत व्यापक कॉम्बिंग ऑपरेशन राबविण्यात आले. मा. उपविभागीय पोलीस अधिकारी (SDPO) यांच्या मार्गदर्शनाखाली राबविण्यात आलेल्या या मोहिमेत ५ पोलीस अधिकारी, २५ पोलीस अंमलदार तसेच स्थानिक गुन्हे शाखेच्या (LCB) पथकाचा सहभाग होता. या कारवाईदरम्यान पोलिसांच्या अभिलेखावरील सराईत गुन्हेगार, शरीर व मालमत्तेविरुद्ध गुन्हे दाखल असलेले आरोपी तसेच अवैध धंद्यांशी संबंधित संशयितांच्या ठिकाणी अचानक तपासणी व झडती घेण्यात आली. ५५ रेकॉर्डवरील आरोपींवर कारवाई कॉम्बिंग ऑपरेशनदरम्यान पोलिसांनी अभिलेखावरील एकूण ५५ गुन्हेगारांना ताब्यात घेऊन पोलीस ठाण्यात आणले. गणेशोत्सवाच्या काळात कोणत्याही प्रकारचे गैरकृत्य अथवा कायदा-सुव्यवस्थेला बाधा निर्माण करणारी कृती करू नये, याबाबत त्यांना कडक समज देण्यात आली. हद्दपार गुन्हेगारावर गुन्हा दाखल पाचोरा शहरातून हद्दपार करण्यात आलेला सराईत गुन्हेगार मुख्तार शेख उर्फ धाड्या हा पोलिसांना हद्दीत आढळून आला. त्याच्याविरुद्ध मुंबई पोलीस कायदा कलम १४२ अन्वये गुन्हा दाखल करून कायदेशीर कारवाई करण्यात आली. ११ अजामीनपात्र वॉरंट तामील न्यायालयात प्रलंबित असलेल्या विविध प्रकरणांतील ११ अजामीनपात्र वॉरंट (NBW) पोलिसांनी यशस्वीरीत्या तामील केले. त्यामुळे प्रलंबित आरोपींवरही कारवाईचा बडगा उगारण्यात आला. अवैध दारू विक्रीवर धाड पोलिसांनी प्रोहिबिशन रेड अंतर्गत अवैध दारू विक्री करणाऱ्यांविरुद्धही कारवाई केली. या कारवाईत २२ हजार ४० रुपयांचा मुद्देमाल जप्त करण्यात आला. गोवंश वाहतूक व बेकायदेशीर शस्त्राविरुद्धही कारवाई मोहिमेदरम्यान अवैध गोवंश वाहतुकीप्रकरणी एक कारवाई, तर आर्म्स ॲक्टअंतर्गत बेकायदेशीर शस्त्र बाळगल्याप्रकरणी एक कारवाई करण्यात आली. पोलिसांचा स्पष्ट इशारा गणेशोत्सवाच्या पार्श्वभूमीवर शहरातील शांतता व कायदा-सुव्यवस्था बिघडविण्याचा प्रयत्न करणाऱ्या, कायदा हातात घेणाऱ्या तसेच अवैध धंदे चालविणाऱ्या असामाजिक घटकांची कोणतीही गय केली जाणार नाही, असा स्पष्ट इशारा पाचोरा पोलिसांकडून देण्यात आला आहे. गणेशोत्सव काळात अशाच प्रकारे धडक तपासणी, कॉम्बिंग ऑपरेशन आणि पोलिसांचे पेट्रोलिंग यापुढेही सुरू राहणार असल्याचे पोलिस प्रशासनाने स्पष्ट केले आहे.

चौकाचौकात पोलिसांची नजर; ट्रिपल सीट, विनालायसन्स, विनानंबर प्लेट वाहनचालकांवर कारवाईचा बडगा जामनेर प्रतिनिधी | JBN महाराष्ट्र NEWS शहरातील वाहतूक व्यवस्था अधिक शिस्तबद्ध करण्यासाठी जामनेर पोलिसांनी आता आक्रमक पवित्रा घेतला आहे. पोलीस निरीक्षक निवृत्ती बोऱ्हाडे यांच्या मार्गदर्शनाखाली शहरातील प्रमुख चौक तसेच गर्दीच्या ठिकाणी पोलिसांचा कडेकोट बंदोबस्त तैनात करण्यात आला असून, वाहतूक नियमांचे उल्लंघन करणाऱ्या वाहनचालकांवर कारवाई केली जात आहे.शहरातील वाढती वाहनांची वर्दळ, चौकांमध्ये होणारी गर्दी आणि वाहतूक नियमांकडे दुर्लक्ष करणाऱ्या वाहनचालकांना शिस्त लावण्यासाठी पोलिसांकडून विशेष लक्ष केंद्रित करण्यात आले आहे. ट्रिपल सीट वाहनचालक, विनालायसन्स वाहन चालविणारे, विनानंबर प्लेट वाहने तसेच वाहतूक नियमांचे उल्लंघन करणाऱ्या वाहनांवर पोलिसांची करडी नजर आहे.विशेषतः दुचाकीवरून नियमबाह्य पद्धतीने प्रवास करणाऱ्या तरुणांवर पोलिसांकडून कारवाई केली जात असून, वाहन चालवताना आवश्यक कागदपत्रे व वैध परवाना जवळ बाळगण्याचे आवाहन पोलिसांकडून करण्यात येत आहे.चौकाचौकात पोलिसांची उपस्थितीजामनेर शहरातील प्रमुख चौकांमध्ये पोलीस कर्मचारी तैनात करून नियमभंग करणाऱ्या वाहनांची तपासणी केली जात आहे. त्यामुळे वाहतूक नियमांचे उल्लंघन करणाऱ्या वाहनचालकांमध्ये चांगलीच धास्ती निर्माण झाली आहे.“वाहतूक नियम पाळा, सुरक्षित प्रवास करा” हा संदेश देत पोलिसांकडून नागरिकांना सहकार्य करण्याचे आवाहन करण्यात येत आहे. पोलिसांच्या या मोहिमेमुळे शहरातील वाहतूक व्यवस्था अधिक सुरळीत होण्यास मदत होणार असून, नियम पाळणाऱ्या नागरिकांकडूनही या कारवाईचे स्वागत होत आहे.PI निवृत्ती बोऱ्हाडे यांच्या मार्गदर्शनाखाली कारवाईला वेगपोलीस निरीक्षक निवृत्ती बोऱ्हाडे यांच्या मार्गदर्शनाखाली जामनेर पोलिसांनी शहरातील वाहतूक शिस्तीला प्राधान्य दिले आहे. नियम मोडणाऱ्यांना कोणतीही सवलत न देता कायद्यानुसार कारवाई करण्याची भूमिका पोलिसांनी घेतल्याचे दिसून येत आहे.शहरात शिस्त हवी असेल तर नियम पाळावेच लागतील, असा स्पष्ट संदेश या कारवाईतून जामनेर पोलिसांनी दिला आहे. आगामी काळातही वाहतूक नियमभंग करणाऱ्यांवर कारवाई सुरू राहण्याची शक्यता आहे.

क्षत्रिय माळी समाजाच्या वतीने सालाबादप्रमाणे आयोजन; उत्सव पाहण्यासाठी समाजबांधवांची मोठी गर्दी जामनेर : शेतकरी बांधवांचा पारंपरिक आणि श्रद्धेचा सण असलेल्या बैलपोळ्यानंतरच्या दुसऱ्या दिवशी जामनेर शहरात दरवर्षीप्रमाणे क्षत्रिय माळी समाजाच्या वतीने पारंपरिक ‘बारा गाड्या’ उत्सव साजरा केला जातो. अनेक वर्षांपासून चालत आलेल्या या उत्सवाला जामनेर शहरासह परिसरातील नागरिक आणि समाजबांधवांचा मोठा प्रतिसाद मिळतो. ‘बारा गाड्या’ हा उत्सव जामनेरच्या पारंपरिक धार्मिक आणि सांस्कृतिक परंपरेचा महत्त्वाचा भाग मानला जातो. पोळ्याच्या दुसऱ्या दिवशी होणाऱ्या या पारंपरिक उत्सवाची नागरिकांमध्ये विशेष उत्सुकता असते. उत्सवाच्या निमित्ताने परिसरात भक्तिमय आणि उत्साहाचे वातावरण निर्माण होते. हा पारंपरिक सोहळा पाहण्यासाठी क्षत्रिय माळी समाजातील समाजबांधवांसह विविध समाजातील नागरिक, महिला, पुरुष, युवक आणि ज्येष्ठ नागरिक मोठ्या संख्येने उपस्थित राहतात. त्यामुळे उत्सवाच्या ठिकाणी मोठी गर्दी पाहायला मिळते. पारंपरिक पद्धतीने साजरा होणाऱ्या या उत्सवात नागरिकांचा उत्स्फूर्त सहभाग असतो. ‘बारा गाड्या’ उत्सवाच्या माध्यमातून समाजाची एकजूट, श्रद्धा, परंपरा आणि सांस्कृतिक वारसा जपण्याचे काम केले जाते. पूर्वजांपासून चालत आलेली ही परंपरा पुढील पिढीपर्यंत पोहोचावी आणि नव्या पिढीला आपल्या पारंपरिक संस्कृतीची ओळख व्हावी, यासाठी या उत्सवाला विशेष महत्त्व आहे. दरवर्षीप्रमाणे यंदाही उत्सवाच्या आयोजनासाठी क्षत्रिय माळी समाजाचे पदाधिकारी, कार्यकर्ते आणि समाजबांधवांकडून आवश्यक नियोजन व तयारी केली जाते. उत्सव शांततेत, शिस्तीत आणि उत्साहपूर्ण वातावरणात पार पडावा, यासाठीही आवश्यक खबरदारी घेतली जाते. पोळ्यानंतरच्या दुसऱ्या दिवशी जामनेरमध्ये साजरा होणारा हा पारंपरिक ‘बारा गाड्या’ उत्सव नागरिकांच्या आकर्षणाचा केंद्रबिंदू ठरतो. परंपरा, श्रद्धा आणि सामाजिक एकोप्याचे दर्शन घडविणाऱ्या या उत्सवासाठी समाजबांधवांसह नागरिकांची मोठी उपस्थिती पाहायला मिळते.

PI निवृत्ती बोऱ्हाडे यांच्या नेतृत्वाखाली कडक कारवाई; कर्कश आवाजाच्या बुलेट, ट्रिपल सीट व विनालायसन्स वाहनचालकांवर नजर जामनेर : शहरातील वाहतूक व्यवस्था सुरळीत ठेवण्यासोबतच वाहतूक नियमांचे उल्लंघन करणाऱ्या वाहनचालकांवर आळा घालण्यासाठी जामनेर पोलिसांनी कडक कारवाईची मोहीम सुरू केली आहे. नव्याने रुजू झालेले पोलीस निरीक्षक निवृत्ती भिमराव बोऱ्हाडे यांच्या नेतृत्वाखाली शहरातील प्रमुख रस्त्यांवर वाहनांची तपासणी करण्यात येत आहे. या कारवाईदरम्यान कर्कश आवाज करणाऱ्या बुलेट, ट्रिपल सीट प्रवास तसेच विनालायसन्स वाहन चालविणाऱ्या अल्पवयीनांकडे विशेष लक्ष देण्यात येत आहे. पोलिसांकडून वाहनचालकांची तपासणी करून वाहतूक नियमांचे उल्लंघन करणाऱ्यांवर नियमानुसार कारवाई करण्यात येत आहे. काही वाहनांमध्ये मॉडिफाइड सायलेन्सरचा वापर करून मोठ्या आवाजात वाहने चालविली जात असल्याचे निदर्शनास येते. अशा प्रकारच्या कर्कश आवाजामुळे नागरिकांना त्रास होण्यासोबतच वाहतूक सुरक्षेचाही प्रश्न निर्माण होऊ शकतो. तसेच ट्रिपल सीट प्रवास आणि अल्पवयीनांकडून वाहन चालविण्यामुळे अपघाताचा धोका वाढण्याची शक्यता आहे. “वाहतूक नियमांचे पालन करणे ही प्रत्येकाची जबाबदारी आहे. नागरिकांच्या सुरक्षिततेसाठी वाहतूक नियमांचे उल्लंघन करणाऱ्यांवर नियमानुसार कारवाई सुरूच राहील,” असा स्पष्ट संदेश जामनेर पोलिसांकडून देण्यात आला आहे. जामनेर पोलिसांच्या या कारवाईमुळे वाहतूक नियमांकडे दुर्लक्ष करणाऱ्या वाहनचालकांमध्ये धास्ती निर्माण झाली असून, नागरिकांकडून या मोहिमेचे स्वागत केले जात आहे. वाहतूक नियम पाळा… सुरक्षित प्रवास करा!

पाटील मळा परिसरातील घटनेने खळबळ; आईशी बोलण्याच्या कारणावरून वाद झाल्याची प्राथमिक माहिती भुसावळ (प्रतिनिधी) : भुसावळ शहरातील पाटील मळा परिसरात गुरुवारी, १० सप्टेंबर रोजी रात्रीच्या सुमारास एका तरुणावर हल्ला करून त्याचा खून झाल्याची घटना समोर आली आहे. या घटनेमुळे परिसरात खळबळ उडाली आहे. या घटनेत तुषार गोविंदा सोनवणे (वय ३५) यांचा मृत्यू झाल्याचे समोर आले आहे. प्राथमिक माहितीनुसार, तुषार सोनवणे हे एका महिलेच्या आईशी बोलत असल्याच्या कारणावरून वाद निर्माण झाला. या वादाचे रूपांतर हल्ल्यात झाल्याचा प्राथमिक संशय व्यक्त करण्यात येत आहे. घटनेची माहिती मिळताच पोलिसांनी घटनास्थळी धाव घेतली. पोलिसांनी तपासाची चक्रे फिरवत १७ वर्षीय अल्पवयीन संशयिताला ताब्यात घेतल्याची माहिती आहे. अल्पवयीन असल्याने त्याची ओळख कायद्यानुसार जाहीर करण्यात आलेली नाही. दरम्यान, या हत्येमागील नेमके कारण काय होते, वाद नेमका कशामुळे झाला आणि हल्ल्याचा संपूर्ण घटनाक्रम काय आहे, याबाबत पोलीस तपास सुरू आहे. आईशी बोलण्याच्या कारणावरून वाद झाल्याची माहिती ही प्राथमिक स्वरूपाची असून, तपास पूर्ण झाल्यानंतरच घटनेमागील नेमके कारण स्पष्ट होणार आहे. या घटनेमुळे पाटील मळा परिसरासह भुसावळ शहरात खळबळ उडाली असून, पोलिसांकडून पुढील तपास सुरू आहे.

जामनेर येथील ज्ञानगंगा माध्यमिक व उच्च माध्यमिक विद्यालयात आज दि.०९-०९-२०२६ रोजी राष्ट्रीय बाल स्वास्थ कार्यक्रमांतर्गत जिल्हा आरोग्य अधिकारी यांच्या मार्गदर्शनाने आरबीएसके टीम द्वारे सर्व शालेय इ.५ वी ते इ.१२ वी च्या सर्व उपस्थित विद्यार्थ्यांची आरोग्य तपासणी करण्यात आली. त्यावेळी विद्यालयाचे प्राचार्य राजेंद्र सोनवणे यांनी सर्व डॉक्टरांचे पुष्पगुच्छ देऊन स्वागत केले.त्यावेळी डॉ. राजेश सोनवणे(तालुका वैदयकीय अधिकारी जामनेर यांनी सर्व विद्यार्थ्यांची आरोग्य तपासणी सर्व टीमच्या वतीने करण्यात आली.त्यावेळी डॉ. राजेश सोनवणे यांनी विद्यार्थ्यांना आरोग्याबाबत मार्गदर्शन केले.डॉ.जितेंद्र वानखेडे,डॉ.अनिता राठोड, प्रियंका वानखेडे, हर्षा गवळे, या सर्व टीमने एकूण ७७६ विद्यार्थ्यांची आरोग्य तपासणी करून विद्यार्थ्यांना मेडिसिन चे वाटप करण्यात आले.त्यावेळी विद्यालयाचे प्राचार्य श्री राजेंद्र सोनवणे यांनी मार्गदर्शन करताना सर्व विद्यार्थ्यांनी “आरोग्य हीच धनसंपदा” या नुसार स्वतःचे आरोग्य सांभाळावे व डॉक्टरांनी दिलेल्या सल्ल्याप्रमाणे मार्गदर्शनाप्रमाणे आपली दैनंदिन दिनचर्या सुनिश्चित करावी असे आव्हान केले.सदर आरोग्य तपासणीस शाळेतील सर्व शिक्षक शिक्षकेतर कर्मचारी बंधू-भगिनी यांनी विशेष परिश्रम घेतले.

पोलीस पाटील गोपाल मुळे यांच्या हस्ते पारंपरिक पद्धतीने पूजा; ग्रामस्थांची मोठी उपस्थिती वाकडी, ता. जामनेर, दि. ११ सप्टेंबर २०२६ :शेतकरी बांधवांचा पारंपरिक आणि श्रद्धेचा सण असलेल्या बैल पोळ्यानिमित्त गोरनाळे येथे सालाबादप्रमाणे यंदाही उत्साहात बैल पोळा साजरा करण्यात आला. यावेळी श्री. उखर्डू काशिनाथ पाटील यांच्या बैलास पोळ्याचा मान देण्यात आला. गोरनाळे गावचे पोलीस पाटील श्री. गोपाल सुकदेव मुळे यांच्या हस्ते श्री. उखर्डू काशिनाथ पाटील यांच्या बैलाची पारंपरिक पद्धतीने पूजा करण्यात आली. त्यानंतर बैलास पोळ्याचा मान देण्यात आला. यावेळी मा. सरपंच श्री. आत्माराम दयाराम पाटील, मा. तंटामुक्ती समिती अध्यक्ष श्री. दिनकर नीना कोळी, PSI महाजन साहेब, पोलीस मुकेश पाटील यांच्यासह गावातील नागरिक, शेतकरी व तरुण मोठ्या संख्येने उपस्थित होते. पोळ्यानिमित्त मानाच्या बैलाला आकर्षक सजावट करण्यात आली होती. पारंपरिक पद्धतीने पूजा, सणाचा उत्साह आणि ग्रामस्थांची उपस्थिती यामुळे गावात आनंदाचे आणि उत्साहाचे वातावरण निर्माण झाले होते. शेतकऱ्याच्या जीवनात बैलाला अनन्यसाधारण महत्त्व आहे. वर्षभर शेतीच्या कामात शेतकऱ्याला साथ देणाऱ्या या मुक्या जीवाप्रती कृतज्ञता व्यक्त करण्याची परंपरा म्हणून बैल पोळा साजरा केला जातो. या सणाच्या माध्यमातून शेतकरी आणि बैल यांच्यातील अतूट नाते अधोरेखित होते. गोरनाळे येथे वर्षानुवर्षे जपली जाणारी ही परंपरा पुढील पिढ्यांनीही कायम ठेवावी आणि आपल्या ग्रामीण संस्कृती व परंपरांचा अभिमान बाळगावा, असा संदेश यानिमित्ताने देण्यात आला.