Maharashtra

जिनियस मास्टर्स फाउंडेशन, जामनेर तर्फे उल्लेखनीय शैक्षणिक कार्याची दखल जामनेर (प्रतिनिधी) : जिनियस मास्टर्स फाउंडेशन, जामनेर यांच्या वतीने शैक्षणिक क्षेत्रात उल्लेखनीय योगदान देणाऱ्या शिक्षकांचा गौरव करण्यासाठी आयोजित करण्यात आलेल्या राज्यस्तरीय ‘आदर्श शिक्षकरत्न पुरस्कार’ सोहळ्यात जामनेर येथील प्रिय मित्र संतोष राठोड व रमाई लोखंडे यांना राज्यस्तरीय आदर्श शिक्षकरत्न पुरस्काराने सन्मानित करण्यात आले. शिक्षण क्षेत्रात विद्यार्थ्यांच्या सर्वांगीण विकासासाठी सातत्याने प्रयत्न करणे, विद्यार्थ्यांमध्ये शैक्षणिक गुणवत्ता वाढविण्यासोबतच संस्कार, शिस्त, सामाजिक जाणीव आणि आत्मविश्वास निर्माण करण्यासाठी योगदान देणे, तसेच शैक्षणिक क्षेत्रात उल्लेखनीय कार्य करणाऱ्या शिक्षकांच्या कार्याची दखल घेऊन हा पुरस्कार प्रदान करण्यात आला. जिनियस मास्टर्स फाउंडेशनच्या वतीने देण्यात येणारा हा सन्मान शिक्षकांच्या कार्याला प्रोत्साहन देणारा असून, त्यांच्या शैक्षणिक योगदानाची राज्यस्तरावर दखल घेतल्याने परिसरातून त्यांच्यावर अभिनंदनाचा वर्षाव होत आहे. संतोष राठोड व रमाई लोखंडे यांच्या या उल्लेखनीय यशाबद्दल मित्रपरिवार, सहकारी, शिक्षण क्षेत्रातील मान्यवर तसेच नागरिकांकडून त्यांचे मनःपूर्वक अभिनंदन करण्यात येत आहे. त्यांच्या पुढील शैक्षणिक वाटचालीसाठी शुभेच्छा व्यक्त करण्यात आल्या. “शिक्षणाच्या माध्यमातून समाज घडविणाऱ्या शिक्षकांचा सन्मान म्हणजे ज्ञानाच्या कार्याचा गौरव होय,” अशी भावना यानिमित्ताने व्यक्त करण्यात आली.

ढोल-ताशांच्या गजरात गणरायाला भावपूर्ण निरोप; ग्रामस्थ व भाविकांची मोठी उपस्थिती वाकडी (प्रतिनिधी) : वाकडी गावातील जय बजरंग गणेश मित्र मंडळाच्या वतीने यंदाच्या गणेशोत्सवाची सांगता गणपती विसर्जन सोहळ्याने भक्तिमय आणि उत्साहपूर्ण वातावरणात झाली. गणरायाच्या विसर्जनानिमित्त मंडळाच्या वतीने विशेष सजावट करण्यात आलेल्या वाहनातून श्री गणेशाची भव्य मिरवणूक काढण्यात आली. मिरवणुकीदरम्यान ढोल-ताशांचा गजर, भक्तिमय वातावरण आणि ‘गणपती बाप्पा मोरया, पुढच्या वर्षी लवकर या!’च्या जयघोषाने संपूर्ण परिसर दुमदुमून गेला. गणरायाचे दर्शन घेण्यासाठी तसेच मिरवणुकीत सहभागी होण्यासाठी गावातील नागरिक, महिला, युवक आणि भाविक मोठ्या संख्येने उपस्थित होते. गणेशभक्तांनी पारंपरिक पद्धतीने नृत्य करत आणि जयघोष करत गणरायाला निरोप दिला. यावेळी अनेक भाविकांनी गणरायाच्या चरणी पुढील वर्षी पुन्हा आगमनासाठी प्रार्थना केली. संपूर्ण विसर्जन मिरवणूक उत्साह, भक्ती आणि आनंदाच्या वातावरणात पार पडली. जय बजरंग गणेश मित्र मंडळाच्या कार्यकर्त्यांनी विसर्जन सोहळ्याचे नियोजन शिस्तबद्ध पद्धतीने केले. त्यामुळे संपूर्ण कार्यक्रम शांततेत आणि सुरळीत पार पडला. गणेशोत्सवाच्या काळात मंडळाच्या माध्यमातून विविध धार्मिक व सामाजिक उपक्रम राबविण्यात आल्याने ग्रामस्थांमध्येही उत्साहाचे वातावरण होते. या विसर्जन सोहळ्यात मंडळाचे वैभव देशमुख, रविंद्र राजपूत, मनोज दांडगे, आशुतोष गायकवाड, हर्षल दांडगे आणि बबलू राजपूत यांच्यासह मंडळाचे कार्यकर्ते व ग्रामस्थ मोठ्या संख्येने सहभागी झाले. अखेर भक्तिभावाने गणरायाला निरोप देत ‘गणपती बाप्पा मोरया, पुढच्या वर्षी लवकर या!’ असा जयघोष करण्यात आला आणि यंदाच्या गणेशोत्सवाची उत्साहपूर्ण सांगता झाली. 🙏 जय बजरंग गणेश मित्र मंडळ, वाकडी🌺 गणपती बाप्पा मोरया! पुढच्या वर्षी लवकर या! 🙏

करपलेल्या शेतातून उगवलेले स्वप्न… महाराष्ट्राच्या मातीत अनेक स्वप्ने रुजतात. कुणाच्या शेतात ज्वारी उगवते, कुणाच्या अंगणात कष्टाचे संस्कार; आणि याच मातीतून एखादा तरुण अधिकारी होण्याचे स्वप्न घेऊन उभा राहतो. गावच्या मातीतून शहराच्या स्पर्धेच्या विश्वात आलेल्या या तरुणाच्या डोळ्यांत केवळ स्वतःचे भविष्य नसते. आई-वडिलांच्या कष्टांना अर्थ मिळावा, घरची परिस्थिती बदलावी आणि आपल्या गावाचे नाव उज्ज्वल व्हावे, अशी अनेक स्वप्ने त्याच्यासोबत चालत असतात. मात्र काही वेळा परिस्थिती स्वप्नांपेक्षा अधिक कठोर असते. ग्रामीण भागातील दुष्काळ हा केवळ पावसाचा अभाव नसतो. तो शेतकऱ्याच्या उत्पन्नाचा, कुटुंबाच्या आर्थिक स्थैर्याचा आणि पुढच्या पिढीच्या आशेचा प्रश्न असतो. पिके करपली की केवळ शेत रिकामे होत नाही; घरातील आर्थिक गणितही कोलमडते. अशा परिस्थितीत एखादा ग्रामीण तरुण MPSC ची तयारी करत असेल, तर त्याच्या पुस्तकांमागे आई-वडिलांचे कष्ट, त्याग आणि अपूर्ण राहिलेल्या गरजा असतात. तरीही तो अभ्यास करतो. कारण त्याला विश्वास असतो की एक दिवस ही परीक्षा त्याच्या आयुष्याला नवी दिशा देईल. पण स्पर्धा परीक्षेचा प्रवास सोपा नसतो. अनेक वर्षांचा अभ्यास, सततची अनिश्चितता, आर्थिक अडचणी, परीक्षांचे वेळापत्रक, निकालाची प्रतीक्षा आणि अपयशाची भीती, या सगळ्यांशी विद्यार्थ्याला एकाच वेळी सामना करावा लागतो. त्यातच परीक्षा प्रक्रियेतील गैरप्रकार किंवा पेपरफुटीच्या बातम्या समोर आल्या की प्रश्न केवळ परीक्षेचा राहत नाही; तो विश्वासाचा होतो. “मी दिवसरात्र जीव तोडून अभ्यास करतोय; पण माझ्या मेहनतीला खरंच न्याय मिळणार आहे का?” हा प्रश्न विद्यार्थ्याच्या मनात निर्माण होणे हीच व्यवस्थेसाठी गंभीर बाब आहे. पेपरफुटीचा सर्वात मोठा परिणाम प्रश्नपत्रिकेवर होत नाही; तो विद्यार्थ्याच्या विश्वासावर होतो, त्याच्या मानसिकतेवर होतो. एका बाजूला ग्रामीण कुटुंब आर्थिक संकटाशी झुंजत असते, तर दुसऱ्या बाजूला त्यांचा मुलगा आपल्या भवितव्यासाठी दिवस-रात्र पुस्तकांशी झुंजत असतो. अशा वेळी परीक्षा व्यवस्थेतील एका गैरप्रकाराची बातमी त्याच्या मनातील अनेक प्रश्नांना जन्म देऊ शकते. म्हणून एखाद्या विद्यार्थ्याच्या दुःखद मृत्यूकडे केवळ वैयक्तिक अपयश या दृष्टीने पाहणे योग्य ठरणार नाही. त्याच्यावर ही वेळ का आली याचासुद्धा गांभीर्याने विचार व्हायला हवा. दुष्काळ, आर्थिक विवंचना, स्पर्धेचा ताण आणि परीक्षा व्यवस्थेवरील अविश्वास यांसारख्या घटकांकडे समाजाने गांभीर्याने पाहण्याची गरज आहे. प्रश्न असा आहे की, आपण आपल्या विद्यार्थ्यांकडून फक्त संघर्षाची अपेक्षा करणार आहोत की त्यांच्या संघर्षात व्यवस्थाही त्यांच्या सोबत उभी राहणार आहे? शासनाने परीक्षा प्रक्रियेत पारदर्शकता आणि उत्तरदायित्व अधिक मजबूत केले पाहिजे. गैरप्रकारांच्या तक्रारींवर तातडीने आणि विश्वासार्ह चौकशी झाली पाहिजे. दोषींवर कठोर कारवाई झाली पाहिजे. त्याचबरोबर ग्रामीण आणि आर्थिकदृष्ट्या अडचणीत असलेल्या विद्यार्थ्यांसाठी मार्गदर्शन, समुपदेशन आणि आधारव्यवस्था अधिक सक्षम करण्याची गरज आहे. कारण MPSC ही केवळ एक परीक्षा नाही. ती महाराष्ट्रातील हजारो कुटुंबांच्या आशेची वाट आहे. त्या वाटेवर चालणारा विद्यार्थी जेव्हा पुस्तक उघडतो, तेव्हा त्याच्यासोबत त्याच्या आई-वडिलांची स्वप्नेही उघडली जातात. शेतात पिके करपली तरी पुढच्या पावसाची आशा शेतकरी धरून ठेवतो. तशीच आशा विद्यार्थ्याच्या मनातही जिवंत राहिली पाहिजे. व्यवस्थेने विद्यार्थ्याला निष्पक्ष संधीची हमी देणे तिचे कर्तव्य आहे. एका विद्यार्थ्याच्या दुःखद अंताची केवळ हळहळ व्यक्त करून ही घटना संपता कामा नये. त्याच्या स्वप्नामागील दुष्काळ, त्याच्या संघर्षामागील वेदना, आर्थिक विवंचना आणि त्याच्या मनातील व्यवस्थेविषयीचा प्रश्न आपण समजून घेतला पाहिजे. कारण करपलेल्या शेतातूनही स्वप्न उगवू शकते; फक्त त्या स्वप्नाला जगण्याची, लढण्याची आणि पुढे जाण्याची निष्पक्ष संधी देणारी व्यवस्था हवी. मातीतून उगवलेल्या या स्वप्नांना परिस्थितीच्या उन्हात कोमेजू न देता, त्यांना आशेच्या पावसाने बहरण्याची संधी देणे ही समाजाची आणि व्यवस्थेची जबाबदारी आहे. कारण एखाद्या गरीब घरातील विद्यार्थ्याच्या हातातून पुस्तक निसटते, तेव्हा केवळ एक पुस्तक बंद होत नाही—तर एका तरुणाचे स्वप्न, एका घराची आशा आणि एका पिढीचा व्यवस्थेवरील विश्वास डळमळतो. म्हणून आता गरज आहे ती केवळ संवेदना व्यक्त करण्याची नाही, तर अशी व्यवस्था उभी करण्याची, जिथे परिस्थिती गरीब असली तरी संधी गरीब नसेल; जिथे शेत करपले तरी स्वप्ने करपू नयेत…

जळगाव जिल्ह्यात दुष्काळसदृश परिस्थिती; जामनेरसह सहा तालुक्यांत सरासरीच्या ७० टक्क्यांपेक्षा कमी पाऊस जळगाव : JBN महाराष्ट्र NEWS राज्यातील दुष्काळसदृश परिस्थितीची पाहणी करण्यासाठी मुख्यमंत्री देवेंद्र फडणवीस यांनी मराठवाड्यातील लातूर, धाराशिव आणि सोलापूर भागांचा दौरा केला, तर उपमुख्यमंत्री एकनाथ शिंदे यांनी विदर्भातील अमरावती, अकोला आणि बुलढाणा भागाची पाहणी केली. या पाहणी दौऱ्यांमुळे दुष्काळग्रस्त शेतकऱ्यांच्या प्रश्नांना थेट शासनस्तरावर आवाज मिळाला आहे. मात्र, याचवेळी खान्देशातील जळगाव जिल्ह्याचा क्रमांक कधी लागणार? हा प्रश्न आता उपस्थित होत आहे. जळगाव जिल्ह्यातील जळगाव, भुसावळ, यावल, चाळीसगाव, जामनेर आणि बोदवड या तालुक्यांत सरासरीच्या ७० टक्क्यांपेक्षाही कमी पाऊस झाल्याचे वृत्त आहे. पावसाचे प्रमाण आणि वितरण अनियमित राहिल्याने उडीद, मूग, सोयाबीन, तीळ, मका आणि ज्वारीसह खरीप पिकांवर परिणाम झाल्याचेही नमूद करण्यात आले आहे. जामनेरचा बळीराजा आभाळाकडे पाहतोय… जामनेर तालुक्यातील शेतकऱ्यांसाठी परिस्थिती चिंतेची आहे. पेरणीपासून आजपर्यंत केलेला खर्च, पिकांची झालेली वाढ आणि त्यानंतर पावसाने दिलेली ओढ—या सगळ्याचा फटका शेतकऱ्याच्या अर्थकारणाला बसत आहे. शेतात भेगा पडल्या आहेत…पिकांची अवस्था डोळ्यांसमोर आहे…आणि शेतकऱ्याची नजर मात्र अजूनही आभाळावर आहे. दुष्काळ म्हणजे फक्त कोरडी जमीन नाही.दुष्काळ म्हणजे जनावरांच्या चाऱ्याची चिंता, पिण्याच्या पाण्याची चिंता, शेतीवर झालेल्या खर्चाची चिंता आणि पुढील हंगामाचे भविष्य काय, याची चिंता. दुष्काळाची अधिसूचना कधी? पाहणी दौरा कधी? मुख्यमंत्र्यांनी दुष्काळासंदर्भातील अधिसूचना काढण्याचे काम सुरू असल्याचे सांगितले असून, उपलब्ध माहितीनुसार येत्या शनिवारपूर्वी अधिसूचना काढण्याचे संकेत दिले आहेत. परिस्थितीची माहिती जसजशी उपलब्ध होईल, तसतसा संबंधित भागांचा समावेश केला जाईल, असेही सांगण्यात आले आहे. जळगाव जिल्ह्यासाठी दुष्काळी उपाययोजनांकरिता महसूलमंत्री चंद्रशेखर बावनकुळे यांच्या अध्यक्षतेखालील मंत्रिमंडळ उपसमितीत गिरीष महाजन आणि गुलाबराव पाटील यांचा समावेश करण्यात आला आहे. त्यामुळे जिल्ह्यातील बाधित शेतकऱ्यांना मदतीची अपेक्षा निर्माण झाली आहे. मात्र शेतकऱ्यांचा सवाल कायम आहे— “मराठवाडा आणि विदर्भातील शेतकऱ्यांच्या बांधावर सरकार पोहोचले… मग खान्देशच्या शेतकऱ्यांच्या बांधावर पाहणी कधी?” “जळगाव जिल्ह्याच्या दुष्काळाची अधिकृत घोषणा कधी?” “जामनेरच्या बळीराजाला मदत कधी?” आज जामनेरच्या शेतकऱ्याला राजकीय आश्वासनांपेक्षा प्रत्यक्ष पाहणी, पंचनामे, पिकांची वस्तुनिष्ठ नोंद आणि वेळेत मदत यांची प्रतीक्षा आहे. आभाळाकडे पाहणाऱ्या बळीराजाला आता केवळ पावसाचीच नाही…तर सरकारच्या मदतीचीही आस आहे. — JBN महाराष्ट्र NEWS

१४ व १७ वर्षे वयोगटातील मुलांच्या संघांची जिल्हास्तरावर निवड जामनेर : प्रतिनिधी शालेय शिक्षण व क्रीडा विभाग, क्रीडा व युवा संचालनालय, महाराष्ट्र राज्य, पुणे तसेच जिल्हा क्रीडा अधिकारी कार्यालय, जळगाव व जिल्हा क्रीडा परिषद, जळगाव यांच्या संयुक्त विद्यमाने आयोजित जामनेर तालुकास्तरीय शालेय खो-खो स्पर्धेत पळासखेडे मिराचे येथील नि. पं. पाटील विद्यालयाने उल्लेखनीय कामगिरी करत दुहेरी यश संपादन केले. बुधवार, दि. २३ सप्टेंबर २०२६ रोजी रोटवद येथे १४ व १७ वर्षे वयोगटातील मुलांच्या तालुकास्तरीय खो-खो स्पर्धा उत्साहात पार पडल्या. या स्पर्धेत नि. पं. पाटील विद्यालय, पळासखेडे मिराचे येथील १४ वर्षे वयोगटातील मुलांच्या संघाने प्रथम क्रमांक पटकावत जिल्हास्तरीय स्पर्धेसाठी आपली निवड निश्चित केली. तसेच १७ वर्षे वयोगटातील मुलांच्या संघानेही दमदार खेळाचे प्रदर्शन करत प्रथम क्रमांक मिळवला असून, या संघाचीदेखील जिल्हास्तरीय स्पर्धेसाठी निवड झाली आहे. दोन्ही संघांनी केलेल्या उत्कृष्ट कामगिरीमुळे विद्यालयाच्या क्रीडा क्षेत्रातील यशात आणखी एक मानाचा तुरा रोवला गेला आहे. या यशाबद्दल संस्थेचे चेअरमन आदरणीय दादासाहेब श्री. संजयरावजी गरुड, शेंदुर्णी शिक्षण संस्थेचे व्हा. चेअरमन आबासाहेब श्री. भीमरावजी शेळके, संस्थेचे सचिव काकासाहेब श्री. सागरमलजी जैन, सहसचिव दादासाहेब श्री. यु. यु. पाटील, संस्थेचे ज्येष्ठ संचालक व स्थानिक सल्लागार समितीचे अध्यक्ष श्री. रघुनाथ निळकंठ पाटील, कार्यालयीन सचिव भाऊसाहेब श्री. दीपकरावजी गरुड, तसेच संस्थेचे सर्व संचालक मंडळ यांनी खेळाडूंचे अभिनंदन केले. यासोबतच वसतिगृहाचे सचिव आ. श्री. गो. गो. सूर्यवंशी, स्थानिक कमिटीचे अध्यक्ष, उपाध्यक्ष व सर्व सदस्य, पंचक्रोशीतील ग्रामस्थ, खेळाडूंचे पालक यांनीही विजयी खेळाडूंचे कौतुक करून त्यांना जिल्हास्तरीय स्पर्धेसाठी शुभेच्छा दिल्या. विद्यालयाचे मुख्याध्यापक श्री. जे. आर. पाटील सर, पर्यवेक्षक श्री. आर. पी. पाटील सर, क्रीडाशिक्षक श्री. डी. आर. चौधरी सर, तसेच विद्यालयातील शिक्षक, शिक्षकेतर कर्मचारी व वसतिगृहातील कर्मचाऱ्यांनी खेळाडूंच्या यशाबद्दल आनंद व्यक्त केला. १४ व १७ वर्षे वयोगटातील दोन्ही संघांनी मिळवलेले हे यश विद्यालयाच्या क्रीडा परंपरेला बळ देणारे असून, आता जिल्हास्तरीय स्पर्धेतही पळासखेडे विद्यालयाचे खेळाडू दमदार कामगिरी करतील, असा विश्वास व्यक्त करण्यात आला. 💐🏆

पुरातत्त्व विभागात उल्लेखनीय यश; शेंदुर्णी परिसरातून अभिनंदनाचा वर्षाव जंगीपुरा, ता. जामनेर : जंगीपुरा येथील डॉ. सरिता बाबूलाल राजपूत यांनी महाराष्ट्र लोकसेवा आयोगाच्या (MPSC) परीक्षेत उल्लेखनीय यश संपादन करत महाराष्ट्र शासनाच्या पुरातत्त्व विभागात सहाय्यक संचालक या पदावर निवड मिळवली आहे. त्यांच्या या यशामुळे जंगीपुरा तसेच शेंदुर्णी परिसराच्या शैक्षणिक व सामाजिक क्षेत्रात आनंदाचे वातावरण निर्माण झाले असून, त्यांच्यावर अभिनंदनाचा वर्षाव होत आहे. डॉ. सरिता राजपूत यांचे पदव्युत्तर पदवीपर्यंतचे शिक्षण गरुड महाविद्यालयात, तर बारावीपर्यंतचे शिक्षण गरुड विद्यालयात झाले आहे. स्थानिक शैक्षणिक संस्थांमधून शिक्षण घेत त्यांनी स्पर्धा परीक्षेच्या माध्यमातून मिळवलेले हे यश परिसरातील विद्यार्थ्यांसाठी निश्चितच प्रेरणादायी ठरले आहे. डॉ. सरिता राजपूत या जंगीपुरा येथील प्रगतशील शेतकरी रामेश्वर राजपूत यांच्या भगिनी आहेत. ग्रामीण भागातून आलेल्या डॉ. राजपूत यांनी मेहनत, सातत्य आणि जिद्दीच्या जोरावर महाराष्ट्र शासनाच्या महत्त्वाच्या पदापर्यंत मजल मारली आहे. त्यांच्या या यशाबद्दल जंगीपुरा, शेंदुर्णी तसेच परिसरातील नागरिक, शैक्षणिक क्षेत्रातील मान्यवर, मित्रपरिवार व नातेवाईकांकडून त्यांचे मनःपूर्वक अभिनंदन करण्यात येत आहे. त्यांच्या पुढील शासकीय सेवेसाठी सर्व स्तरातून शुभेच्छा व्यक्त होत आहेत.

झाडाकडे पाहिलं की एक गोष्ट प्रकर्षाने जाणवते—गळून पडणं म्हणजे संपणं नसतं.ऋतू बदलतात, पाने गळतात, फांद्या कोरड्या पडतात; कधी वादळ झाडाची एखादी फांदी तोडून नेतं. पण त्या झाडाच्या आत कुठेतरी पुन्हा नव्याने जगण्याची ताकद जिवंत असते. योग्य वेळ आली की त्याच खोडावरून एक नाजूक हिरवा कोंब बाहेर येतो… आणि झाड पुन्हा एकदा अंकुरतं.माणसाचं आयुष्यही यापेक्षा वेगळं नाही.कधी एखादं नातं तुटतं, कधी विश्वासाला तडा जातो, कधी मेहनत करूनही अपेक्षित यश मिळत नाही. काही स्वप्नं डोळ्यांसमोरच विखुरतात. परिस्थिती आपल्याला अशा वळणावर आणून उभी करते, जिथे पुढचा रस्ता दिसत नाही. त्या वेळी मनात एकच प्रश्न निर्माण होतो—“आता पुढे काय?”पण निसर्गाचं उत्तर अगदी साधं असतं—“पुन्हा सुरुवात कर.”झाड गळून पडलेल्या पानांचा हिशोब ठेवत नाही. काल किती फांद्या तुटल्या, कोणत्या ऋतूत किती नुकसान झालं, याचा विचार करत बसत नाही. ते फक्त आपल्या मुळांवर विश्वास ठेवतं आणि योग्य वेळ येताच पुन्हा हिरवं होतं.माणूस मात्र अनेकदा जुन्या आठवणींच्या ओझ्याखाली स्वतःलाच बांधून घेतो. कुणीतरी केलेला अपमान, मिळालेलं अपयश, तुटलेलं नातं, गमावलेली संधी… आपण सगळं मनात साठवत जातो. आणि मग हळूहळू मन कठीण होतं.सगळ्या गोष्टी सोडून देऊन पुन्हा एकदा अंकुरणे हे झाडाला जमते;आणि सगळ्या गोष्टी मनात ठेवून अकडणे माणसाला.म्हणूनच कधी कधी स्वतःला थोडं मोकळं करणं गरजेचं असतं.जे झालं ते स्वीकारणं गरजेचं असतं.ज्यांनी सोडून दिलं, त्यांना सोडून देणं गरजेचं असतं.आणि सर्वात महत्त्वाचं म्हणजे—स्वतःला पुन्हा एक संधी देणं गरजेचं असतं.कारण आयुष्याची सुंदरता ही सगळं आपल्या मनासारखं घडण्यात नाही; तर जे आपल्या मनासारखं घडलं नाही, त्यानंतरही पुन्हा उभं राहण्यात आहे.आज जर आयुष्य एखाद्या कोरड्या फांदीसारखं वाटत असेल, तरी निराश होऊ नका. कदाचित त्या शांततेच्या आत एक नवा अंकुर जन्म घेण्याच्या तयारीत असेल.गळून पडलेलं पान झाडाची ओळख नसतं;त्यातून पुन्हा फुटलेला कोंब ही त्याची खरी जिद्द असते.म्हणून भूतकाळाला ओझं न बनवता अनुभव बनवा.मनात कटुता न ठेवता शांतता निवडा.आणि प्रत्येक नव्या सकाळीकडे एक नवी संधी म्हणून पाहा.कारण आयुष्य किती वेळा आपण पडलो याची कथा नसते;तर प्रत्येक वेळी आपण पुन्हा कसे अंकुरलो, याची कहाणी असते.✍🏻 एकमन संतोष भिसे

सेवेत खाकीची ममता; चिमुकल्याला कुशीत घेऊन रणरागिणी पोलिसाची कर्तव्यनिष्ठा जामनेर : जे बी एन महाराष्ट्र न्यूज ‘सद्रक्षणाय खलनिग्रहणाय’ या ब्रीदवाक्याला जागत बजावले कर्तव्य; हृदयस्पर्शी क्षणाने उपस्थितांचे डोळे पाणावले जामनेर : गणरायाला निरोप देण्यासाठी शहरात भक्तांची मोठी गर्दी उसळली होती. ढोल-ताशांचा गजर, ‘गणपती बाप्पा मोरया’चा जयघोष आणि उत्साहाचे वातावरण सर्वत्र पाहायला मिळत होते. या उत्सवी वातावरणात कायदा व सुव्यवस्था अबाधित ठेवण्यासाठी पोलिस अधिकारी व कर्मचारी अहोरात्र कर्तव्य बजावत होते. याचदरम्यान एका महिला पोलिस कर्मचाऱ्याने आपल्या चिमुकल्याला कुशीत घेत बंदोबस्ताची जबाबदारी पार पाडल्याचे हृदयस्पर्शी दृश्य समोर आले. गणेश विसर्जनाच्या पार्श्वभूमीवर शहरातील विविध ठिकाणी पोलिसांचा कडक बंदोबस्त तैनात करण्यात आला होता. हजारो भाविक विसर्जन मिरवणुकीत सहभागी झाले होते. गर्दीत कोणताही अनुचित प्रकार घडू नये, भाविकांची सुरक्षितता अबाधित राहावी आणि उत्सव शांततेत पार पडावा, यासाठी पोलिस कर्मचारी सतर्क होते. याच कर्तव्यादरम्यान एका महिला पोलिस कर्मचाऱ्याचे आपल्या चिमुकल्याला कुशीत घेतलेले दृश्य अनेकांचे लक्ष वेधून घेत होते. एका बाजूला लेकराची माया आणि दुसऱ्या बाजूला नागरिकांच्या सुरक्षेची जबाबदारी, अशा दोन्ही भूमिका ही माऊली एकाच वेळी निभावताना दिसली. एका कुशीत लेकरू… तर दुसरीकडे समाजाच्या सुरक्षेची जबाबदारी! आई म्हणून आपल्या लेकराची काळजी घेणे आणि पोलिस कर्मचारी म्हणून नागरिकांच्या सुरक्षेची जबाबदारी पार पाडणे, या दोन्ही जबाबदाऱ्या या रणरागिणीने एकाच वेळी जपल्या. गणरायाच्या उत्सवात नागरिक आनंदोत्सव साजरा करत असताना, खाकी वर्दीतील अनेक महिला पोलिस कर्मचारी मात्र आपला सण, कुटुंबाचा सहवास आणि वैयक्तिक भावना बाजूला ठेवून कर्तव्यावर तैनात होत्या. ‘सद्रक्षणाय खलनिग्रहणाय’ या पोलिस दलाच्या ब्रीदवाक्याला जागत ही रणरागिणी आपले कर्तव्य बजावताना दिसली. एका हातात मातृत्वाची माया, तर दुसरीकडे कर्तव्याची जबाबदारी, असा हा भावनिक क्षण उपस्थितांसाठी अविस्मरणीय ठरला. गणरायाच्या विसर्जनासाठी आलेल्या भाविकांच्या सुरक्षिततेसाठी खाकी वर्दीतील पोलिस कर्मचारी स्वतःचा सण आणि कुटुंबाचा सहवास बाजूला ठेवून कर्तव्य बजावत होते. त्यामुळे या महिला पोलिस कर्मचाऱ्याचे हे दृश्य कर्तव्य, मातृत्व आणि त्यागाचा हृदयस्पर्शी संगम ठरले. एका बाजूला गणरायाची सेवा आणि दुसऱ्या बाजूला आई म्हणून आपल्या लेकराची माया… कर्तव्यापासून एक पाऊलही मागे न हटता या माऊलीने दोन्ही जबाबदाऱ्या जपल्याचे हे दृश्य पाहून उपस्थितांच्या डोळ्यांतही पाणी आले. आईच्या मायेइतकीच कर्तव्याची जाणीव जपणाऱ्या या रणरागिणीला सलाम!खाकी वर्दीतील प्रत्येक कर्तव्यनिष्ठ पोलिस कर्मचाऱ्याला मानाचा मुजरा! 🚔🙏 गणपती बाप्पा मोरया! 🌺

मारहाण करून फरफटत नेल्याचा नातेवाईकांचा संशय; सखोल चौकशीची मागणी जामनेर | सोमवार, २१ सप्टेंबर | जेबीएन महाराष्ट्र न्यूज जामनेर शहरातील शास्त्रीनगर परिसरात २८ वर्षीय तरुणाचा संशयास्पद मृत्यू झाल्याची घटना रविवारी (दि. २० सप्टेंबर) घडली. बबलू देविदास वाणी असे मृत तरुणाचे नाव आहे. त्यांना मारहाण करून फरफटत नेण्यात आले असावे, असा संशय नातेवाईकांनी व्यक्त केला असून, या प्रकरणाची सखोल चौकशी करण्याची मागणी करण्यात आली आहे. मिळालेल्या माहितीनुसार, रविवारी दुपारी सुमारे ३ वाजेच्या सुमारास काही अज्ञात व्यक्तींनी बबलू वाणी यांना जखमी अवस्थेत रिक्षातून जामनेर उपजिल्हा रुग्णालयात आणून दाखल केले. त्यांची प्रकृती गंभीर असल्याने वैद्यकीय अधिकाऱ्यांनी प्राथमिक उपचार केल्यानंतर पुढील उपचारासाठी त्यांना जळगाव येथे हलविण्याचा निर्णय घेतला. मात्र उपचार सुरू असतानाच त्यांचा मृत्यू झाला. मृत्यूनंतर बबलू वाणी यांचा मृतदेह जामनेर उपजिल्हा रुग्णालयाच्या शवागारात ठेवण्यात आला आहे. दरम्यान, मृताच्या पायावर तसेच उजव्या पृष्ठभागावर फरफटत नेल्यासारख्या जखमा आढळून आल्याचे नातेवाईकांचे म्हणणे आहे. त्यामुळे हा मृत्यू संशयास्पद असून, बबलू यांना मारहाण झाली असावी, असा संशय नातेवाईकांनी व्यक्त केला आहे. दरम्यान, जखमी बबलू वाणी यांना रुग्णालयात घेऊन आलेले व्यक्ती कोण होते, रिक्षा कोणाची होती, त्यांना नेमके कुठून आणण्यात आले आणि त्यावेळी परिस्थिती काय होती, याबाबत अनेक प्रश्न उपस्थित झाले आहेत. या सर्व बाबींची पोलिसांनी सखोल चौकशी करून घटनेमागील नेमके सत्य समोर आणावे, अशी मागणी नातेवाईकांकडून करण्यात आली आहे. या प्रकरणी जामनेर पोलीस ठाण्यात अकस्मात मृत्यूची नोंद करण्यात आली असून, मृत्यूचे नेमके कारण आणि घटनेमागील परिस्थिती स्पष्ट करण्यासाठी पोलिसांकडून तपास सुरू आहे. पोलीस निरीक्षक निवृत्ती बोऱ्हाडे यांच्या मार्गदर्शनाखाली जामनेर पोलीस या प्रकरणाचा तपास करीत आहेत. बबलू वाणी यांच्या पश्चात आई-वडील, पत्नी आणि एक मुलगा असा परिवार आहे. त्यांच्या अचानक व संशयास्पद मृत्यूमुळे कुटुंबीयांमध्ये हळहळ व्यक्त होत असून, या प्रकरणातील नेमके सत्य पोलिसांच्या तपासातून समोर येण्याची प्रतीक्षा आहे.

फैजपूर पोलीस ठाण्यात अपघाताचा गुन्हा दाखल; तपास सुरू यावल : तालुक्यातील यावल-भुसावळ मार्गावर पोद्दार शाळेसमोर दोन दुचाकींची समोरासमोर धडक होऊन अपघात झाला. या प्रकरणी फैजपूर पोलीस ठाण्यात दुचाकी चालकाविरुद्ध अपघाताचा गुन्हा दाखल करण्यात आला आहे. मिळालेल्या माहितीनुसार, गोंडखेल, ता. जामनेर येथील रहिवासी दुचाकीस्वार मोटरसायकल क्रमांक एमएच १९ आर ७७०२ घेऊन जात असताना समोरून निमखेडी, ता. यावल येथील सुरेश कोळी हे मोटरसायकल क्रमांक एमएच १९ सीजी ०४३३ घेऊन येत होते. यावल-भुसावळ रोडवरील पोद्दार शाळेसमोर दोन्ही दुचाकींची समोरासमोर धडक झाली. या अपघातात संबंधित दुचाकीस्वारांना दुखापत झाल्याची माहिती आहे. घटनेनंतर या प्रकरणाची माहिती पोलिसांना देण्यात आली. याप्रकरणी विक्रम बारेला यांनी दिलेल्या फिर्यादीवरून मोटरसायकल क्रमांक एमएच १९ सीजी ०४३३ वरील चालक सुरेश कोळी यांच्याविरुद्ध फैजपूर पोलीस ठाण्यात अपघाताचा गुन्हा दाखल करण्यात आला आहे. या प्रकरणाचा पुढील तपास सहाय्यक पोलीस अधिकारी संदीप पाटील यांच्या मार्गदर्शनाखाली सहाय्यक फौजदार नागेंद्र तायडे करीत आहेत.